მახინჯაურში გერმანელ სამხედრო ტყვეთა საფლავები აღადგინეს. გერმანელ სამხედრო ტყვეთა სასაფლაოების აღდგენასთან დაკავშირებით ოფიციალური ცერემონია დღეს გაიმართა, რომელსაც გერმანიის ფედერაციული რესპუბლიკის საელჩოს სამხედრო ატაშე, ვიცე პოლკოვნიკი მიხაელ ფრიკე, აჭარის ავტონომიური რესპუბლიკის უმაღლესი საბჭოს, მთავრობისა და ქალაქის თვითმმართველობის წარმომადგენლები დაესწრნენ.
ცერემონიაზე შეკრებილ საზოგადოებას, რომლებმაც სამხედრო ტყვეთა საფლავები გვირგვინებით შეამკეს, საკრებულოს თავმჯდომარემ ირაკლი ჩავლეიშვილმა და გერმანიის ფედერაციული რესპუბლიკის საელჩოს სამხედრო ატაშემ, ვიცე პოლკოვნიკმა მიხაელ ფრიკემ მიმართეს. მათ ორ ქვეყანას შორის ურთიერთანამშრომლობასა და მეორე მსოფლიო ომის მსხვერპლთა შესახებ ისაუბრეს, ასევე მადლობა გადაუხადეს ადგილობრივ მკვიდრს ანდრო ქავთარაძეს, რომელმაც რამდენიმე წლის წინ განადგურებული სამხედრო ტყვეთა საფლავები აღმოაჩინა და ამ დროის განმავლობაში უვლიდა მათ.
ანდრო ქავთარაძის თქმით, მახინჯაურში ეს საფლავები 1947 წლიდან არსებობს, გერმანელი ტყვეები: რობერტ შვაბკი, ფრიც ბუგოლცი, ვალტერ ქიუხელი და გაინც ფაბიო მეორე მსოფლიო ომში ტყვედ ჩავარდნის შემდეგ, ბათუმში გზებზე და საცხოვრებელ სახლებზე, სხვადასხვა სამუშაოებს ასრულებდნენ.
მიმდინარე წლის 28 თებერვალს, საკრებულოს თავმჯდომარის ირაკლი ჩავლეიშვილის ინიციატივით, საკრებულომ მიიღო გადაწყვეტილება, აღდგენილიყო ჯარისკაცთა საფლავები. აღდგენითი სამუშაოები ააიპ „ბათუმის სასაფლაოებმა" აწარმოა, სამუშაოებისთვის კი ქალაქის ბიუჯეტიდან 3900 ლარი დაიხარჯა.
