ბადრი პატარკაციშვილის ოჯახსა და ვანო ჩხარტიშვილს შორის ქონებრივ დავასთან დაკავშირებით მოლაპარაკებებში ლევან გაჩეჩილაძე გოგა ხაინდრავა იყვნენ ჩართულნი. ლევან გაჩეჩილაძემ "ჯი-ეიჩ-ენთან" საუბარში დაადასტურა, რომ იგი პატარკაციშვილის ოჯახის ინტერესებს იცავდა.
"ვადასტურებ. ბადრი პატარკაციშვილის სახელთან და მის ოჯახთან მე მაკავშირებს მორალური და ზნეობრივი ვალდებულებები, გამომდინარე ჩემი განვლილი ცხოვრებიდან", - განუცხადა "ჯი-ეიჩ-ენს" ლევან გაჩეჩილაძემ.
მისივე თქმით, მოლაპარაკებებს შედეგი არ მოყოლია.
"უბრალოდ გეტყვით, რომ მე იურიდიულ საკითხებში ჩართული არა ვარ, მე წმინდა ადამიანური კუთხით ვმონაწილეობდი, რამეთუ ვიცნობ ორივე მხარეს. შედეგი არ არის ჯერ. ვანო ჩხარტიშვილმა უნდა გადაწვიტოს რას აპირებს ქონების დაბრუნების მიზნით. ჯერ შედეგი დამდგარი არ არის", - განაცხადა ლევან გაჩეჩილაძემ.
გაჩეჩილაძის თქმით, მხარეთა შესაბამისი ინიციტივის შემთხვევაში იგი კვლავ მზად არის ჩაერთოს მოლაპარაკებებში და მიჩნევს, რომ კარგი იქნება თუ მხარეთა შორის შეთახმება შედგება, მაგრამ ამ ეტაპზე მხარებს მოლაპარაკებების განახლების სურვილი არ გამოუხატავთ.
"რა თქმა უნდა მზად ვარ კვლავ ჩავერთო მოლაპარაკებებში. გაუმარჯოს შეთანხმებას - მე აქეთკენ ვარ მთელი ჩემი ცხოვრება, რომ შეთანხმება არის ძალიან მნიშვნელოვანი", - განაცხადა ლევან გაჩეჩილაძემ.
შეგახსენებთ, რომ დღეს გაზეთმა "პრაიმტაიმმა" გაავრცელა ინფორმაცია, რომლის თანახმადაც ვანო ჩხარტიშვილი შესაძლოა დააკავონ. ინფორმაციას, რომ ჩხარტიშვილის მიერ ბადრი პატარკაციშვილის ქონების მითვისებაზე ფინანსთა სამინისტროს საგამოძიებო სამსახურში გამოძიება მიმდინარეობას, საგამოძიებო სამსახურის პრესსამსახურის უფროსი, ნათია სუხიაშვილიც ადასტურებს.
