პარლამენტში განათლების კომიტეტის სხდომაზე დეპუტატებმა საზოგადოებრივი მაუწყებლის შესახებ კანონში ცვლილებები განიხილეს. განათლების კომიტეტის თავმჯდომარის მოადგილის ელისო ჩაფიძის თქმით, დღევანდელ კომიტეტის სხდომაზე საპარლამენტო უმცირესობისა და უმრავლესობის წარმომადგენლებმა მხოლოდ რამდენიმე მუხლში ცვლილებების შეტანა მოითხოვეს. ხოლო ძირითადი პრინციპული მოთხოვნები არ შეცვლილა.
„ამ დღეებში ჩვენ გვექნება სესიაზე მეორე განხილვა საზოგადოებრივ მაუწყებლის შესახებ. სამ მუხლთან იყო არსებითი შენიშვნები, პრინციპული საკითხები კი არ შეცვლილა. ასევე დღევანდელი კომიტეტის სხდომაზე მოხდა, მუხლების უფრო მკაფიო ჩამოყალიბება. ერთ შემთხვევაში საპროცედურო კომიტეტის რეკომენდაციით, მეორე შემთხვევაში ეკონომიკის სამინისტროს და არასამთავრობო ორგანიზაციის „საერთაშორისო გამჭვირვალობის" მიერ" განაცხადა ელისო ჩაფიძემ.
შეგახსენებთ, რომ საზოგადოებრივი მაუწყებლის შესახებ კანონი ითვალისწინებს, რომ აჭარის ტელევიზია საზოგადოებრივი მაუწყებლის დაქვემდებარებაში გადავიდეს. ასევე საზოგადოებრივ მაუწყებელში უნდა შეიცვალოს სამეურვეო საბჭოს დაკომპლექტება, რომელიც 9 ადამიანისგან შედგება. სადაც სამს საპარლამენტო უმცირესობა, სამს საპარლამენტო უმრავლესობა, ორს სახალხო დამცველი, ხოლო ერთს აჭარის ავტონომიური რესპუბლიკის უმაღლესი საბჭო წარადგენს.
