"სახალხო კრების" მიერ ორგანიზებული აქციის დაშლიდან, რომელიც მსხვერპლით დასრულდა, ორი წელი გავიდა. 2011 წლის 26 მაისს სპეცრაზმმა პარლამენტის წინ შეკრებილ მომიტინგეთა დასაშლელად ცრემლსადენი გაზი, რეზინის ტყვიები, წყლის ჭავლი და ხელკეტები გამოიყენა. ფარებით და ხელკეტებით შეიარაღებულმა სპეცრაზმელებმა თავიანთი პოზიციების დაკავება რუსთაველის გამზირის ორივე მხარეს ღამის 12 საათის შემდეგ, დაახლოებით, 00:10 საათზე დაიწყეს. აქციის დაშლის მიზეზად, რუსთაველის გამზირზე სამხედრო აღლუმისთვის მზადება დასახელდა.
თბილისის მერიამ წარმომადგენელი გააგზავნა მომიტინგეებთან, რომ აქციის გამართვის უფლება აღარ ჰქონდათ, რადგანაც მათი განაცხადი აქციის ჩატარების თაობაზე 25 მაისს, დღის ბოლოს ამოიწურა. მომიტინგეებმა, რომლებიც წვიმაში იდგნენ აქციაზე, უარი თქვეს ხელისუფლების წინადადების მიღებაზე, რომ სხვა ადგილას განეგრძოთ აქცია.
26 მაისს ერთი პოლიციელი და სამი მომიტინგე გარდაიცვალა.
აქცის დაშლისას პოლიციამ რამდენიმე ათეული ადამიანი დააკავა. სპეცრაზმის მიერ გამოყენებული არაპრპორციული ძალის შედეგად დაშავდა ათობით ადამიანი, როგორც აქციის მონაწილები ასევე ჟურნალისტები.
შინაგან საქმეთა სამინისტროს განცხადებით, გარდაცვალების არც ერთი ფაქტი არ უკავშირდება სპეცრაზმის ქმედებებს. სამინისტროს ინფორმაცით, პოლიციელი და ერთი მომიტინგე საპროტესტო აქციიდან გამოსული მანქანების სწრაფად მიმავალმა კოლონამ გაიტანა. შინაგან საქმეთა სამინისტრომ განაცხადა, რომ "ორი მამაკაცის გვამი" იქნა აღმოჩენილი 27 მაისს თავისუფლების მეტროსთან მდებარე ერთ-ერთი მაღაზიის სახურავზე, იმ ტერიტორიის სიახლოვეს, სადაც ორი დღის წინ სპეცრაზმმა მომიტინგეები დაარბია და სამხედრო აღლუმი ჩატარდა. შსს-მ წინასწარი მონაცემებით, ორი ადამიანის გარდაცვალების მიზეზად ელექტროსადენებთან მათი შეხება დაასახელა.
სახალხო დამცველი და საერთაშორისო ორგანიზაციები ხელისუფლება გამოძიებისკენ მოუწოდებდნენ. შინაგან საქმეთა სამინისტრომ განაცხადა, რომ 26 მაისის აქციის დაშლასთან დაკავშირებით სულ 16 პოლიციელის მიმართ დაისვა დისციპლინარული პასუხისმგებლობის საკითხი, მათ შორის სამინისტროს ოთხი თანამშრომელი სამსახურიდან იქნა დათხოვნილი.
ოპოზიციამ, აშშ-ის ელჩი ჯონ ბასი ხელისუფლების მხარდაჭერაში დაადანაშაულა და განაცხადეს, რომ ჯონ ბასმა ხელისუფლებას აქციის დასარბევად მწვანე შუქი აუნთო. ამგვარი განცხადება რამდენიმე ოპოზიციურმა პოლიტიკოსმა, მათ შორის იმ პერიოდისთვის ქართული პარტიის ლიდერმა სოზარ სუბარმა, გააკეთა.
