"ჰომოსექსუალები არ იბადებიან მხოლოდ ევროპაში და დასავლურ ქვეყნებში. ჰომოსექსუალები იბადებიან ყვენგან, ხოლო ის ქვეყნები, რომლებიც ამბობენ, რომ ჰომოსექსუალები არ ჰყავთ - ის ქვეყნები უბრალოდ ხოცავენ მათ", _ განაცხადა უფლებადამცველმა თამარ გურჩიანმა გადაცემა "აქცენტებში".
"თუ ჩვენ არ გვინდა ევროპა, მაშინ რა გვინდა? გვინდა ირანი სადაც ჰომოსექსუალებს მხოლოდ იმიტომ, რომ ისინი ჰომოსექსუალები არიან ახრჩობენ და საუდის არაბეთი სადაც მათ თავს კვეთენ - კი ბატონო, ეს არის არჩევანი. მაგრამ არჩევანს საბედნიეროდ არ აკეთებს მხოლოდ უმრავლესობა და ჯერ კიდევ საკითხავია, აქვს თუ არა ამ ხალხს რომელიც ძალადობის პროპაგანდას ეწევა, უმრავლესობის სახელით საუბრის უფლება", _ აცხადებს გურჩიანი და აღნიშნავს, რომ ჩვენ ყველა ვართ დაბადებით თავისუფალი და თანასწორი. თანასწორობას ჩვენ არ გვანიჭებს არც ერთი სახელმწიფო ან რელიგიური ლიდერო - ჩვენ დავიბადეთ ასეთად, ეს არის ჩვენი თანასწორობის უფლება.
"დღეს ქართულმა სახელმწიფომ და ეკლესიამ რაც წაართვა ჰომოსექსუალებს - ეს იყო მათი უფლება ჰქონდეთ უფლებები. ჩვენ მათ წავართვით უფლებების ქონის უფლება, იმიტომ, რომ ჩვენ წავართვით მათ თანასწორობა და ეს ფაქტი, თუ ეს ხალხი არ დაისაჯა სათანადოდ, უნდა შეფასდეს როგორც პირდაპირი დისკრიმინაცია ამ ადამიანებისა", _ აცხადებს უფლებადამცველი.