სხვადასხვა პირები, 40-50 ადამიანის დასაცავად ასე რომ გამოდიან, უნდა მოეთხოვოთ მათ, უცხოეთიდან შემოსული თანხები გაკონტროლდეს, სად მიედინება, - ამის შესახებ სრულიად საქართველოს კათოლიკოს-პატრიარქის ქორეპისკოპოსმა, ბოდბელმა ეპისკოპოსმა იაკობმა დღეს სამებაში გამართული პარაკლისის შემდეგ განაცხადა. სამებაში სამადლობელი პარაკლისის დასრულების შემდეგ, ტაძარში მყოფ მრევლს მეუფემ ქადაგებით მიმართა.
"იყო საშიშროება, რომ დაპირისპირება მომხდარიყო და მაინც წავიდნენ ამაზე, ვიღაცეები უნდათ გაახარონ, ადრე მოსკოვში, თეირანში თუ ახარებდნენ, დღეს სხვა ქალაქებში უნდათ გაახარონ. უღირსი ცხოვრებით უფლის წინაშე ვერ წარვდგებით. რომელი დამპყრობელი არ შემოვიდა საქართველოში, მაგრამ ვერ გადაგვაგვარა, ეკლესია არის ქრისტეს ნათელი, აქ სიბნელე არ არის. არასდროს გავაკეთებთ იმას, რაც სახელმწიფოსთვის საშიშია", - განაცხადა პატრიარქის ქორეპისკოპოსმა.