15 მაისს მოსული ძლიერი სეტყვის შედეგად დაზარალებულებმა გურჯაანის რაიონის სოფლებში ვეჯინსა და კოლაგში გურჯაანი - თბილისის ცენტრალური გზა გადაკეტეს. ავტომანქანების მოძრაობა შეფერხებულია. როგორც კახეთის საინფორმაციო ცენტრის კორესპონდენტი იტყობინება კოლაგიდან, დაზარალებულები ზარალის დროულად დათვლას და კომპენსაციებს ითხოვენ.
ადგილზე მობილიზებულები არიან საპატრულო პოლიციის თანამშრომლები, თუმცა გზის გახსნა ჯერ ვერ ხერხდება.
შეგახსენებთ, რომ გუშინ საღამოს მოსულმა ძლიერმა სეტყვამ კახეთის სოფლებში ჭანდარში, ძირკოკში, ვეჯინში, კოლაგსა და ბაკურციხეში მოსახლეობას სერიოზული ზიანი მიაყენა. განსაკუთრებით სოფელი კოლაგი დაზარალდა. სტიქიის შედეგად ატმის ბაღები, ვენახები და ბოსტნეული თითქმის მთლიანად განადგურდა. დაზიანდა გზები. კოლაგის ხევიდან გადმოვარდნილმა წყალმა ათეულობით სახლი და ეზო დატბორა. სტიქიის შედეგად კახეთში 8 ათასამდე აბონენტს არ მიეწოდება ელექტროენერგია.
მასალის გამოყენების პირობები
