შეღავათიანი აგროკრედიტის პროექტის უკეთ განხორციელებისათვის საქმეში საკონსულტაციო ჯგუფების ჩართვაა საჭირო, - აცხადებს "ჯი-ეიჩ-ენთან" საუბარში ექსპერტი ეკონომიკურ საკითხებში ირაკლი ლექვინაძე.
ლექვინაძის აზრით, საკონსულტაციო ჯგუფები ფერმერებს მნიშვნელოვან დახმარებას გაუწევენ.
"პროექტი მეტად მნიშვნელოვანია, რადგანაც სოფელში არის კაპიტალის დეფიციტი და ამ დეფიციტის შევსება ამ ფონდის საშუალებით შესაძლებელია. მიმაჩნია, რომ ერთ-ერთი რგოლი, რომელიც სჭირდება ამ პროექტის გამართულად ფუნქციონირებას არის საკონსულტაციო ჯგუფები, რომელიც დაეხმარებიან ფერმერებს, რომელთაც არ აქვთ სათანადო გამოცდილება, და არ აქვთ გაცნობიერებული ის დეტალები, რის გამოც ბანკები მათზე სესხების გაცემაზე უარს ამბობენ. საკონსულტაციო ჯგუფი კი ასეთი ტიპის ფერმერებს გაუწევენ კონსულტაციებს კაპიტალის მართვაში. ლოგიკურია, რომ ბანკი ძალიან მკაცრი კრიტერიუმებით აფასებს ყველა პროექტს, რადგანაც სწორედ ისაა პასუხისმგებელი ამ თანხის გაცემაზე და ხარისხზე. შეიძლება მოხდეს ისე, რომ რომელიმე კომპანიამ მიიღოს დაფინანსება საწარმოს გადაიარაღებისათვის, მაგრამ მას შეექმნას გაყიდვების პრობლემა"- აცხადებს "ჯი-ეიჩ-ენთან" საუბარში ლექვინაძე. ექსპერტი მიიჩნევს, რომ სესხის მიღების შემდეგ საწარმოო ჯაჭვის შესაკრავად ძალიან ბევრი საქმეა გასაკეთებელი და ამაში კი ფერმერებს ეს საკონსულტაციო ჯგუფები უნდა დაეხმარონ.
