საქართველოს პარლამენტმა სასამართლოებთან დაკავშირებით საკანონმდებლო პაკეტზე პრეზიდენტის ვეტო 91 ხმით 26-ის წინააღმდეგ დასძლია.
პაკეტში წარდგენილ დანარჩენ სამ კანონპროექტს 91 დეპუტატმა დაუჭირა მხარი.
ვეტოს დაძლევისთვის საჭირო იყო პარლამენტის სიითი შემადგენლობის 3/5 ანუ 89 ხმა.
პირვანდელი რედაქციების კენჭისყრამდე კი, პარლამენტმა პრეზიდენტის შენიშვნებს და მის მიერ წარდგენილ პროექტებს უყარა კენჭი, თუმცა საჭირო რაოდენობის მხარდაჭერა ვერ მიიღო.
პარლამენტის მიერ ვეტოდაძლეული კანონპროექტები ხელმოსაწერად საქართველოს პრეზიდენტს მიხეილ სააკაშვილს დაუბრუნდება. თუკი პრეზიდენტი შვიდი დღის ვადაში კვლავ არ მოაწერს ხელს, კანონზე ხელს მოაწერს და გამოაქვეყნებს პარლამენტის თავმჯდომარე.
კანონპროექტის მიხედვით, იუსტიციის უმაღლესი საბჭოს წევრებს უფლებამოსილება ვადაზე ადრე უწყდებათ. ვეტოს დაძლევისა და კანონის ამოქმედების შემთხვევაში მოსამართლეთა კონფერენცია ჩატარდება, რომელზეც იუსტიციის საბჭოს ახალ შემადგენლობას აირჩევენ.
პრეზიდენტმა აღნიშნულ კანონპროექტს ვეტო დაადო და პარლამენტს საკუთარი შენიშნვნებით გადაუგზავნა. პრეზიდენტი იუსტიციის უმაღლესი საბჭოს წევრების ვადამდე ადრე დათხოვნას არასწორად მიიჩნევს და აცხადებს, რომ უმრავლესობამ კანონპროექტზე ვენეციის კომისიის რეკომენდაციები არ გაითვალისწინა. ამავე აზრზეა საპარლამენტო უმცირესობაც.
