ვერც დავადასტურებ და ვერც უარვყოფ, რომ მათ მიერ ნასროლი პიროტექნიკით ვარ დაზიანებული, რაც არ დამინახავს, იმას ვერ ვიტყვი, - ამის შესახებ განსაკუთრებულ დავალებათა დეპარტამენტის თანამშრომელმა, ნუგზარ მირიანაშვილმა სასამართლო პროცესზე განაცხადა, სადაც ის ზვიად ცეცხლაძისა და კიდევ 7 პირის საქმეზე ჩვენებას აძლევს.
მირიანაშვილს საქმეში დაზარალებულის სტატუსი აქვს. პოლიციელის ჩვენების მიხედვით, მას პიროტექნიკა მარჯვენა ფეხის არეში მოხვდა, რომელიც იქვე აფეთქდა და დაზიანება მიიღო.
„საღამოს, 20:00 საათზე, როცა მივედი, აქცია ძალადობროვი არ ყოფილა. დაახლოებით, 23:00 საათის შემდეგ დაიწყო ნივთების, პიროტექნიკის სროლა.
მოტეხილობა არ მქონია, მაგრამ დაჟეჟილობა მქონდა, პრეპარატები, ცივი ყინულები დამინიშნეს, დაახლოებით, ორი კვირა რეაბილიტაციას გავდიოდი“, - განაცხადა მირიანაშვილმა.
პროკურორის კითხვაზე, შეუძლია თუ არა ამოცნობა, ან დაინახა თუ არა, ვინ ესროლა მას პიროტექნიკა, მოწმემ განაცხადა, რომ "არ იცის, არ დაუნახავს".
„ვერც დავადასტურებ და ვერც უარვყოფ რომ მათ მიერ ნასროლი პიროტექნიკით ვარ დაზიანებული, რაც არ დამინახავს, იმას ვერ ვიტყვი. არ დამინახავს, ვის მიერ ნასროლი მომხვდა",- განაცხადა მირიანაშვილმა.
გუშინ მირიანაშვილმა აქციების ფარგლებში დაკავებული 11 პირის პროცესზე თქვა: "არც ერთი ბრალდებულის მიმართ პრეტენზია არ გამაჩნია, ვერ დავადასტურებ და ვერც უარყვოფ, რომ მათი ნასროლი მომხვდა, ვერ დავინახე ვინ მესროლა, იყო სიბნელე".
