მიგრაციის მსოფლიო ორგანიზაციის (IOM) პროგრამის ფარგლებში ირლანდიაში გამართული ვიზიტის მიმდინარეობისას დიასპორის საკითხებში საქართველოს სახელმწიფო მინისტრმა კონსტანტინე სურგულაძემ 2013 წლის 24-25 აპრილს შეხვედრები გამართა დიასპორის საკითხებზე მომუშავე ექსპერტებთან (კინგსლი აიკინსი, მარტინ რასელი), ირლანდიის დიასპორის საერთაშორისო ცენტრის, ირლანდიის საწარმოთა მხარდამჭერი სააგენტოს (Enterprise Ireland), ირლანდიის საგარეო საქმეთა დეპარტამენტის, ირლანდიის დიასპორული ფონდების და ირლანდიის ინდუსტრიული განვითარების სააგენტოს წარმომადგენლებთან.
შეხვედრებზე განხილულ იქნა ირლანდიური გამოცდილება დიასპორის მხარდაჭერის, დიასპორული ინვესტიციების მოზიდვის და მეწარმეობის მხარდაჭერის, დიასპორული ფონდების შექმნის და ოპერირების და სხვა მნიშვნელოვანი პროგრამების სფეროში.
განსაკუთრებული ყურადღება დაეთმო დიასპორასთან ურთიერთობის სტრატეგიის შემუშავების აუცილებლობას და მის ეფექტურ განხორციელებას. ირლანდიულმა მხარემ დიდი დაინტერესება გამოხატა დიასპორასთან ურთიერთობის საკითხებში საქართველოში მიმდინარე და დაგეგმილ პროგრამებთან დაკავშირებით.
24 აპრილს კონსტანტინე სურგულაძე შეხვდა დუბლინში მცხოვრებ ქართულ სათვისტომოს.
სახელმწიფო მინისტრი დაესწრო ქართული სიმღერის და ცეკვის გაკვეთილებს, ასევე დუბლინში არსებულ ქართულ სკოლაში მიმდინარე მეცადინეობებს სხვადასხვა საგნებში.
ქართული სათვისტომოს წარმომადგენლებთან ერთად მინისტრი დაესწრო ლოცვას ეკლესიაში.
სათვისტომოსთან გამართულ შეხვედრაზე სახელმწიფო მინისტრმა უპასუხა დიასპორის წარმომადგენლების შეკითხვებს, ასევე გააცნო მათ დიასპორასთან ურთიერთობის სფეროში მიმდინარე და დაგეგმილი პროგრამები და პროექტები.
