25 აპრილს, საქართველოს ფინანსთა მინისტრი, ნოდარ ხადური ივანე ჯავახიშვილის სახელობის თბილისის სახელმწიფო უნივერსიტეტში თსუ-ს გაზეთის "თბილისის უნივერსიტეტის" 85 წლის იუბილესადმი მიძღვნილ საღამოს დაესწრო.
გაზეთის იუბილესთან დაკავშირებით საღამოზე ნაჩვენები იყო დოკუმენტური ფილმი „უნივერსიტეტის გაზეთი - უნივერსიტეტის პოზიცია?!", რომელშიც ფინანსთა მინისტრმა გაიხსენა ის წლები, როცა სტუდენტობის პერიოდში აქტიურად თანამშრომლობდა უნივერსიტეტის გაზეთთან.
,,უნდა აღინიშნოს, რომ ეს არის საუნივერსიტეტო წელი. წელს თავად უნივერსიტეტი 95 წლის გახდა, ხოლო მისი გაზეთი უკვე 85 წელია ძალიან აქტიურადაა ჩართული როგორც სტუდენტურ, ისე უნივერსიტეტის პროფესორებისსამეცნიერო ცხოვრებაში. მიხარია, რომ დღეს მეძლევა შესაძლებლობა როგორც საქართველოს მთავრობის წევრს, იმ გაზეთს, რომელიც ჩემი საყვარელი უნივერსიტეტის სახელს ატარებს, მივულოცო დაბადების დღე," - განაცხადა საქართველოს ფინანსთა მინისტრმა, ნოდარ ხადურმა.
საღამოზე სამახსოვრო ჯილდოები გადაეცათ სტუმრებს, მათ შორის, ფინანსთა მინისტრს, ნოდარ ხადურს - იმ ადამიანებს, რომლებმაც დიდი წვლილი შეიტანეს უნივერსიტეტის გაზეთის გამოცემაში.
„თბილისის უნივერსიტეტი" ერთ-ერთი უძველესი ბეჭდური გამოცემაა საქართველოში. გაზეთი 1927 წელს დაარსდა და ყოველთვის ასახავდა პირველ ქართულ უნივერსიტეტში განვითარებულ მნიშვნელოვან სამეცნიერო თუ სასწავლო პროცესებს, ასევე, ქვეყნის საზოგადოებრივ-პოლიტიკურ თუ კულტურულ ვითარებას.