სერბეთის პრეზიდენტმა ტომისლავ ნიკოლიჩმა ბოსნია-ჰერცოგოვინაში 1992-1995 წლებში მომხდარი ომის დროს ბოსნიელი მუსულმანების წინააღმდეგ ჩადენილი დანაშაულის გამო, სერბეთისა და სერბი ხალხის სახელით ბოდიში მოუხადა.
ეს განცხადება ნიკოლიჩმა ბოსნიურ ტელეარხთან საუბარში გააკეთა, რომელიც ეთერში 7 მაისს უნდა გავიდეს. დღეს მედიამ ამ საუბრის ანონსი გაავრცელა.
პრეზიდენტმა ასევე გააკეთა განცხადება იმის შესახებ, რომ ის აპირებს ქალაქ სრებრენიცას მონახულებას, რომელიც ბოსნია-ჰერცოგოვინის აღმოსავლეთ ნაწილში მდებარეობს და სადაც 1995 წლის ივლისში ბოსნიელ მუსულმანებზე მასობრივი ანგარიშსწორება მოხდა.
ექსპერტების მონაცემებით, სრებრენიცაში დაახლოებით 8 ათასი მუსულმანი მამაკაცი და ბიჭი მოკლეს და ეს მას შემდეგ მოხდა, რაც ეს ქალაქი ბოსნიელი სერბების კონტოროლის ქვეშ გადავიდა გენერალ რადკო მლადიჩის ხელმძღვანელობით.
"დაჩოქილი ვითხოვ პატიებას სრებრენიცაში ჩადენილი დანაშაულის გამო. პატიებას ვითხოვ დანაშაულებისთვის რომელიც ჩვენი სახელმწიფოსა და ხალხის სახელით ცალკეულმა პირებმა ჩაიდინეს", _ განაცხადა პრეზიდენტმა, თუმცა ამ ფაქტის გენოციდად აღიარებაზე უარი განაცხადა.
