"დაზუსტებისთვის ვთქვათ, რომ სტატისტიკის ეროვნული სამსახურის მიერ გამოქვეყნებულ მონაცემებში ორი ძირითადი პროცენტული ციფრია დასახელებული: ერთია 47 %-ი და მერე 3 %-ი. მონაცემებში წერია, რომ 3 %-ითაა შემცირებული 2011 წლის შესაბამისი პერიოდის წინასწარ მაჩვენებელთან. 2011 წლის მეოთხე კვარტლის მაჩვენებლები დაზუსტდა 2012 წლის ზაფხულში. ასე, რომ დაზუსტების პერიოდში შესაძლებელია ეს მაჩვენებლებიც სერიოზულად შეიცვალოს.
სამწუხარო არის ის, რომ 2012 წლის მერე კვარტლიდან საქართველოში უცხოური ინვესტიციების შემოდინების შემცირება დაიწყო. ანუ ეს შემცირება მეოთხე კვარტალში არ მომხდარა. შესაბამისად ინვესტიციების განმსაზღვრელი იყო არჩევნები და ის პოლიტიკური წნეხი, რომელსაც ბიზნესი განიცდიდა წინა ხელისუფლების მხრიდან. კიდევ ერთხელ ვადასტურებთ, რომ ჩვენ გვაქვს დიდი იმედი და ეს იმედი არ არის დამოკიდებული მხოლოდ სურვილებზე, რომ ინვესტიციების თვალსაზრისით 2013 წელი იქნება მნიშვნელოვანი"- განაცხადა ფინანსთა მინისტრმა.
შეგახსენებთ, რომ "საქსტატის" წინასწარი მონაცემებით, 2012 წლის IV კვარტალში საქართველოში განხორციელებული პირდაპირი უცხოური ინვესტიციების მოცულობამ 181 მლნ. აშშ დოლარი შეადგინა, რაც 2011 წლის IV კვარტლის დაზუსტებული მაჩვენებლის 53 პროცენტია.
როგორც სტატისტიკის ეროვნულ სამსახურში განმარტავენ, წინასწარი მონაცემებით, 2012 წლის IV კვარტალში საქართველოში პირდაპირი უცხოური ინვესტიციების შემომავალმა ნაკადებმა 424 მლნ. აშშ დოლარი შეადგინა, რაც 17 პროცენტით ნაკლებია 2011 წლის IV კვარტლის დაზუსტებულ და 3 პროცენტით იმავე პერიოდის წინასწარ მონაცემებზე, ხოლო 2012 წლის III კვარტლის მაჩვენებელს 6 პროცენტით აღემატება.

აღსანიშნავია, რომ უმსხვილესი ინვესტორი ქვეყნების წილმა 2012 წლის IV კვარტალში მთლიანი პირდაპირი უცხოური ინვესტიციების 90 პროცენტი შეადგინა. ინვესტიციების მხრივ პირველ ადგილზე ნიდერლანდები იმყოფება 34 პროცენტით, მეორეზე აზერბაიჯანი - 19 პროცენტით, ხოლო მესამეზე - ჩინეთი 8 პროცენტით.
აღსანიშნავია, რომ 2013 წელს მთავრობა 2 მლნ დოლარამდე ინვესტიციას ელოდება.