საქართველოს სტატისტიკის ეროვნულ სამსახურსა და ჰოლანდიის სტატისტიკის სამსახურს შორის ხელი მოეწერა საგრანტო ხელშეკრულებას, რომლის ფარგლებშიც ჰოლანდიის სტატისტიკის სამსახური საქსტატს გაუწევს ფინანსურ და ტექნიკურ დახმარებას ქ. თბილისში შინამეურნეობების ინტეგრირებული გამოკვლევის შერჩევის ფორმირების (შერჩევის დიზაინის) გაუმჯობესების მიზნით.
შერჩევის დიზაინის გადასინჯვა დადებით როლს შეასრულებს გამოკვლევიდან მიღებული მონაცემების ხარისხის გაზრდის კუთხით და კიდევ უფრო სანდოს გახდის გამოკვლევიდან მიღებულ მონაცემებს.
აღნიშნული სამუშაო ჩატარდება 2013 წლის თებერვლიდან ივნისამდე, რომლის ფარგლებშიც გამოიკითხება დაახლოებით 8,000 შინამეურნეობა.
საქსტატსა და ჰოლანდიის სტატისტიკის სამსახურს შორის ორმხრივი თანამშრომლობა დაიწყო 2011 წელს, რომლის ფარგლებშიც განხორციელდა ორმხრივი სამუშაო ვიზიტები. თანამშრომლობის პროექტი მთლიანად ფინანსდება ჰოლანდიის მთავრობის მიერ.