„ნაციონალური მოძრაობის" გენერალური მდივანი საკუთარი არგუმენტების გადამყარებლად „საქსტატის" ინფორმაციებს იშველიებს. როგორც ვანო მერაბიშვილმა დღეს Facebook-ის მეშვეობით განაცხადა, მისი მიერ გამოქვეყნებული ეკონომიკური მაჩვენებლები სტატისტიკის ეროვნული სამსახურის მიერ საქართველოს საგარეო ვაჭრობის შესახებ გამოქვეყნებული მონაცემებითაც დასტურდება.
„ის მაჩვენებლები, რაზეც ჩვენ ვისაუბრეთ 22 იანვარს გამართულ პრეზენტაციაზე და რომელსაც უარყოფდა საქართველოს მთავრობა, დადასტურდა 25 იანვარს სტატისტიკის ეროვნული სამსახურის მიერ საქართველოს საგარეო ვაჭრობის შესახებ გამოქვეყნებული მონაცემებით. უახლოეს მომავალში სავარაუდოდ გამოქვეყნდება სხვა მონაცემებიც, როგორიც არის დღგ-ს ბრუნვების, სესხებისა და დეპოზიტების და მთლიანი შიდა პროდუქტის ზრდის მაჩვენებლები, რაც აგრეთვე დაემთხვევა ჩვენს მიერ დასახელებულ ციფრებს. აღნიშნული ადასტურებს, რომ მთავრობა სასწრაფოდ უნდა გადავიდეს საგანგებო მუშაობის რეჟიმზე და მიიღოს გადამჭრელი ზომები, რათა თავიდან იქნას აცილებული საბიუჯეტო კრიზისი. http://geostat.ge/cms/site_images/_files/georgian/bop/FTrade_212_GEO.pdf "- აცხადებს ვანო მერაბიშვილი.