სოფლის მეურნეობის მინისტრის პირველი მოადგილე დავით შერვაშიძე ჩარგალში იმყოფებოდა, სადაც მინერალური წყლების მწარმოებელი საწარმო ,,ჩარგლის წყაროები" მოინახულა. თანამედროვე ტექნოლოგიებით აღჭურვილი საწარმო ნატურალურ არომატიზატორებით დამზადებულ სხვადასხვა სახის ლიმონათს და წყაროს წყალს აწარმოებს. ქარხანაში 21 ადგილობრივია დასაქმებული. მომავალში იგეგმება საწარმოს გაფართოვება და კიდევ 30-მდე ადგილობრივის დასაქმება. ,,ჩარგლის წყაროების" ხელმძღვანელობის გადაწყვეტილებით, საწარმოს ტერიტორიაზე არსებული სამკურნალო წყლების ოპტიმალური ათვისებისა და გამოყენების მიზნით, დაგეგმილია ბალნეოლოგიური კურორტის აშენებაც. ეს ტურისტების მოზიდვას განაპირობებს, რაც რეგიონის განვითარებას შეუწყობს ხელს.
დღესვე, მინისტრის მოადგილემ სოფელ შუაფხოში შპს ,,აიესჯი"-ს (ISG) საკალმახე მეურნეობაც დაათვალიერა. მეურნეობაში სხვადასხვა ჯიშის კალმახის მოშენება მიმდინარეობს. დავით შერვაშიძის განცხადებით, ძალიან მნიშვნელოვანია ასეთი საწარმოების შექმნა და ხელშეწყობა განსაკუთრებით მაღალმთიან რაიონებში. ეს ხელს უწყობს ადგილობრივების დასაქმებას და მათი შემოსავლების ზრდას, ასევე საქართველოში მეთევზეობის განვითარებას.
მეურნეობაში დიდი ყურადღება ექცევა ქართული ჯიშის (,,არაგვის") კალმახის გამრავლებას. მეურნეობის ხელმძღვანელობის ინიციატივით, მომავალში მოხდება კალმახის არაგვში გაშვებაც, რაც ხელს შეუწყობს მდინარეში შემცირებული თევზის გამრავლებას.
მეურნეობაში 6 ადგილობრივია დასაქმებული. საკალმახე საწარმოს წარმადობა წელიწადში 50 ტონას შეადგენს.
საწარმოში დანერგილი ახალი სისტემისა და ტექნოლოგიების საშუალებით, მკაცრ ბუნებრივ პირობებშიც კი შესაძლებელია მსგავსი ტიპის მეურნეობების შექმნა. აქედან გამომდინარე, შპს ,,აიერჯი"-ს დამფუძნებლის გიორგი ლომიძის განცხადებით, მიმდინარე წელს კომპანიას დაგეგმილი აქვს საქართველოს სხვადასხვა მაღალმთიან რეგიონში მსგავსი ტიპის საკალმახე მეურნეობების აშენება.
მასალის გამოყენების პირობები
