ფინანსთა მინისტრი მსოფლიო ბანკისგან მისაღები სესხის მოცულობას აზუსტებს. როგორც ნოდარ ხადურმა გადაცემა აქცეტებში საუბრისას განაცხადა, საქართველო მოლაპარაკებებს აწარმოებს მსოფლიო ბანკთან „სულ რაღაც 50 მლნ დოლარის მიღებაზე, რომელიც ირიგაციის სისტემას მოხმარდება".
შეგახსენებთ, რომ 21 იანვარს ცნობილი გახდა, რომ საქართველოს მთავრობა მსოფლიო ბანკისგან მორიგი სესხის აღებას ელოდება. თუმცა როგორც ირკვევა, წინასაარჩევნო დაპირებების შესასრულებლად მთავრობა ახალ სესხს იღებს. ფინანსთა მინისტრის განმარტებით სესხი საკმაოდ დაბალპროცენტიანი იქნება და ის სოფლის მეურნეობის დარგს მოხმარდება.
„მსოფლიო ბანკთან ინტენსიურად ვმუშაობთ სოფლის მეურნეობის დაფინანსების მიმართულებით. ფინანსთა სამინისტრომ წერილი უკვე მიწერა მსოფლიო ბანკს, იმასთან დაკავშირებით რომ საირიგაციო-სადრენაჟო სამუშაოების დასაფინანსებლად იაფი კრედიტი მივიღოთ, რათა სოფლის მეურნეობაში აღებული ვალდებულებები შევასრულოთ"- აცხადებს ნოდარ ხადური.
