საქართველოს პარლამენტის თავმჯდომარე დავით ბაქრაძე თურქეთში ვიზიტის ფარგლებში მსოფლიო პატრიარქს, ყოვლადუწმინდესს ბართლომეოს I შეხვდა.
შეხვედრაზე მსოფლიო პარტიარქმა ყურადღება გაამახვილა საქართველოს მართლმადიდებელი ეკლესიის ისტორიულ როლსა და მის განსაკუთრებულ წვლილზე საქართველოს სახელმწიფოებრიობის ჩამოყალიბებაში. ასევე ხაზი გაუსვა ქართული მართლმადიდებელი ეკლესიის წინამძღოლის, უწმინდესისა და უნეტარესის, კათოლიკოს-პატრიარქის, ილია მეორის განსაკუთრებულ ავტორიტეტს და მისი ჯანმრთელობის მდგომარეობით დაინტერესდა. მსოფლიო პატრიარქმა აღნიშნა, რომ მთელი მართლმადიდებელი სამყარო ლოცულობს მისთვის.
მსოფლიო პატრიარქმა ყოვლადუწმინდესმა ბართლომეოს I-მა ისაუბრა ეკლესიებს შორის არსებულ მჭიდრო, მეგობრულ ურთიერთობებზეც და აღინიშნა, რომ ეკლესია მუდამ უნდა იყოს მშვიდობის გარანტი. მსოფლიო პატრიარქის განცხადებით, რუსული ეკლესიის პოზიცია ცნობილია და მისასალმებელი ის, რომ აფხაზეთისა და ე.წ. სამხრეთ ოსეთის ეკლესიების ავტოკეფალიას არა აღიარებს.
"სასურველია და აუცილებელიც, რომ ეკლესიებს შორის ეს კონტაქტი არ გაწყდეს", - განაცხადა მსოფლიოს პატრიარქმა.
თავის მხრივ, საქართველოს პარლამენტის თავმჯდომარემ დავით ბაქრაძემ აღნიშნა, რომ სწორედ ასეთივე პოზიცია აქვს საქართველოს პატრიარქს, ილია მეორეს.
"მინდა გითხრათ, რომ ეს ერთადერთი ფანჯარაა, სადაც ჯერ კიდევ არსებობს დიალოგის შესაძლებლობა", - განაცხადა საქართველოს პარლამენტის თავმჯდომარემ.
დავით ბაქრაძემ მსოფლიო პატრიარქს მიაწოდა ინფორმაცია კონფლიქტურ რეგიონებში არსებული მართლმადიდებელი ეკლესიების მდგომარეობაზე და აღნიშნა, რომ საომარი მოქმედებების დროს მრავალი მათგანი მნიშვნელოვნად დაზიანდა. აღნიშნა ისიც, რომ სეპარატისტები შეიჭრნენ ეკლესიებში და ქართულ ენაზე არსებული საეკლესიო ლიტერატურა გაანადგურეს. საქართველოს მხარეს მათი აღდგენის საშუალება არ ეძლევა, ხოლო სეპარატისტები და რუსული მხარე სათანადო ყურადღებას არ აქცევს მათ.
ამასთან, საქართველოს პარლამენტის თავმჯდომარე დავით ბაქრაძემ მადლობა გადაუხადა მსოფლიო პატრიარქს გაწეული დახმარებისათვის, მისი ძალისხმევით სტამბულში ვლაქერნის ღვთისმშობლის ეკლესიაში საღმრთო ლიტურგია ქართულ ენაზე აღევლინება.
