"თეატრალურ ხელოვნებაში შეტანილი განსაკუთრებული წვლილისთვის" რუსეთის ფედერაციის თეატრის მოღვაწეთა კავშირმა ცნობილ ქართველ რეჟისორს, რობერტ სტურუას, სპეციალური პრემია - "ოქროს ნიღაბი" მიანიჭა.
2012 წლის "ოქროს ნიღაბის" ლაურეატები ასევე გახდნენ საბჭოთა კავშირის სახალხო არტისტები ტატიანა დორონინა, ლეონიდ ბრონევოი,ივან ბობილევი; რუსეთის სახალხო არტისტები ზინაიდა შარკო და ალექსანდრე ბელინსკი.
ქართული თეატრის ერთ-ერთი ყველაზე გამოჩენილი წარმომადგენელი რობერტ სტურუა 1938 წლის 31 ივლისს თბილისში, ცნობილი მხატვრის, რობერტ სტურუას ოჯახში დაიბადა.
დაამთავრა თბილისის თეატრალური ინსტიტუტის სარეჟისორო ფაკულტეტი. 1962 წლიდან მუშაობდა შოთა რუსთაველის სახელობის თეტრში. 1979 წელს გახდა თეატრის მთავარი რეჟისორი, 1980 წლიდან კი - მისი სამხატვრო ხელმძღვანელი. 1965 წელს რუსთაველის თეატრის სცენაზე სტურუამ დადგა ა. მილერის სეილემის პროცესი, რამაც რეჟისორს პირველი ნამდვილი წარმატება მოუტანა. თეატრალური ფორმის ოსტატობა გამოჩნდა მის მეორე მნიშვნელოვან ნამუშევარში, დ. კლდიაშვილის სამანიშვილის დედინაცვალი, რომელიც თემურ ჩხეიძესთან ერთად დადგა. მნიშვნელოვანი წარმატება მოჰყვა მის სპექტაკლს "ხანუმა".
1970-იან წლებში უკვე გაჩნდა ცნება "რობერტ სტურუას თეატრი". მას გამორჩეული აღიარება მოუტანა პ. კაკაბაძის "ყვარყვარემ", ბ. ბრეხტის "კავკასიური ცარცის წრემ" (1975), და შექსპირის "რიჩარდ III-მ" (1979).
1980-იანი წლები განსაკუთრებით ნაყოფიერი იყო სტურუას შემოქმედებაში. ამ პერიოდში დაიდგა თ. ჭილაძის "როლი დამწყები მსახიობი გოგონასთვის" (1980), მ. შარპოვის "ლურჯი ცხენები წითელ ბალახზე (1980), რ. იბრაგიმბეკოვის "დაკრძალვა კალიფორნიაში" (1983) და ა.შ..
1987 წელს სტურუამ დადგა "მეფე ლირი". 1994 წელს - გოგებაშვილის დედაენის მიხედვით, სპექტაკლი "იაკობის სახარება", 1996 წელს - "ლამარა", გ. რობაქიძის ლირიკულ-მითოლოგიური დრამის მიხედვით. 1997 წელს, ლ. თაბუკაშვილის პიესის მიხედვით - "მერე რა, რომ სველია სველი იასამანი". 1998 წელს, ახალგაზრდა რეჟისორ დ. საყვარელიძესთან ერთად - კ. გოცის პიესა "ქალი-გველი". ამავე წელს მოსკოვში, თეატრ "სატირიკონში", დაიდგა სტურუას "ჰამლეტი", რომელშიც მთავარ როლს ასრულებდა კ. რაიკინი. 2000 წელს ისევ მოსკოვში, თეატრში "Et cetera", დაიდგა "შეილოკი" (შექსპირის "ვენეციელი ვაჭრის" მიხედვით).
რეჟისორი ბევრს მუშაობდა საზღვარგარეთ, მსოფლიოს სხვადასხვა თეატრში დადგმული აქვს შექსპირის, სოფოკლეს, მოლიერის, ჩეხოვის, ბრეხტის პიესები. მიღებული აქვს მრავალი თეატრალური პრემია. საქართველოს სახელმწიფო პრემია (1996), სსრკ სახელმწიფო პრემია (1979), რუსეთის ფედერაციის სახელწიფო პრემია (2000), კოტე მარჯანიშვილის სახელობის პრემია (1976), შოთა რუსთაველის სახელობის პრემია (1981), მიხეილ თუმანიშვილის სახელობის პრემია (1997), ალ. ყაზბეგის სახელობის პრემია (1999) და სხვა. 2008 წელს სტურუა დაახელებულ იქნება წლის ადამიანად და "ოქროს პერგამენტის" ლაურეატი გახდა.