ღონისძიებაში მონაწილეობას მიიღებს სხვადასხვა პროდუქტის მწარმოებელი 30-მდე მეწარმე საქართველოს სხვადასხვა რეგიონებიდან (ჩაი, თაფლი, ხილის და ბოსტნეულის წვენები, ტკბილეული, ღვინო, სუვენირები, ყველი, საკონსერვო პროდუქტები, უალკოჰოლო სასმელები).

ღონისძიების გახსნაში მონაწილეობას მიიღებენ ბიზნესსექტორის, საერთაშორისო ორგანიზაციების და სახელმწიფო სტრუქტურების წარმომადგენლები.

გამოფენა-გაყიდვა-დეგუსტაცია 14 დეკემბერს 11:00 საათზე გაიხსნება და 18:00 საათამდე იმოქმედებს, შაბათ-კვირას კი 11:00 საათიდან 17:00 საათამდე შუალედში.

ღონისძიების - "აირჩიე ქართული გუდვილთან ერთად'' - მიზანია საქართველოს აგრარულ სფეროში მოქმედი მცირე საწარმოების პოპულარიზაცია და მომხმარებლისთვის გაცნობა. ისეთი საწარმოების წარმოჩენა, რომელთაც აქვთ ნატურალური პროდუქტი, მაგრამ არ არიან ცნობილი ბაზარზე, ვერ აკეთებენ ექსპორტს და მომხმარებელი არ იცნობს მათ პროდუქციას.

ღონისძიების ორგანიზატორები არიან "გაყიდვების მართვის კომპანია'', რომლის მიერ შექმნილია ნიშანი "აირჩიე ქართული'' და კომპანია "გუდვილი'', რომელიც უფასოდ გამოყოფს სივრცეს მცირე მეწარმეებისთვის გამოფენის მიმდინარეობის პერიოდში.

"ვგეგმავთ, რომ პროექტი გახდეს ყოველწლიური და უფრო ფართომასტაბიანი მომავალში. პროექტი ხელს შეუწყობს ქართული პროდუქციის პოპულარიზაციას, მათ დამკვიდრებას ადგილობრივ ბაზარზე, სავაჭრო ქსელების მხრიდან შეფუთვისა და ეტიკეტირების მოთხოვნების გაცნობას და მცირე მეწარმეებში მოტივაციის ამაღლებას - შექმნან ახალი პროდუქტები", - აცხადებენ ორგანიზატორები.

კომპანია "გუდვილი'' ლიდერია საქართველოს საცალო ვაჭრობის ბაზარზე და წარმოდგენილია თბილისში 5 ობიექტით, ასევე აქვს ჰიპერმარკეტები ბათუმში და გორში. "გუდვილის'' პრიორიტეტია ქართული პროდუქციის წარმოების მხარდაჭერა და განვითარება.
"გაყიდვების მართვის კომპანიის'' მიერ შექმნილია ნიშანი "აირჩიე ქართული!'' კომპანია საქართველოს რეგიონებში ეძებს ქართული წარმოების ნატურალურ პროდუქციას, ეხმარება ასეთ საწარმოებს გაყიდვების, მენეჯმენტის, მარკეტინგის დაგეგმვაში. ამჟამად კომპანიის პორფელში არის 4 პროდუქტი: ჩაი, თაფლი, ციტრუსის ნატურალური წვენები და ჩაის უალკოჰოლო სასმელი.