შპს ,,გაყიდვების მართვის კომპანია'' და კომპანია ,,გუდვილი'' 2012 წლის 14-16 დეკემბერს, ჰიპერმარკეტ ,,გუდვილის'' დიღმის ფილიალში გეგმავს ქართული პროდუქციის გამოფენა-გაყიდვა-დეგუსტაციის ღონისძიების ორგანიზებას. ღონისძიების ოფიციალური მხარდამჭერია საქართველოს სოფლის მეურნეობის სამინისტრო.
ღონისძიებაში მონაწილეობას მიიღებს სხვადასხვა პროდუქტების მწარმოებელი 30-მდე მეწარმესაქართველოს სხვადასხვა რეგიონებიდან (ჩაი, თაფლი, ხილის და ბოსტნეულის წვენები, ტკბილეული, ღვინო, სუვენირები, ყველი, საკონსერვო პროდუქტები, უალკოჰოლო სასმელები).
ღონისძიების გახსნაში მონაწილეობას მიიღებენ ბიზნეს სექტორის, საერთაშორისო ორგანიზაციების და სახელმწიფო სტრუქტურების წარმომადგენლები.
გამოფენა-გაყიდვა-დეგუსტაცია 14 დეკემბერს 13 საათზე გაიხსნება და 8 საათამდე იმოქმედებს, შაბათ-კვირას კი 11 საათიდან 5 საათამდე პერიოდში.
ღონისძიების - ,,აირჩიე ქართული გუდვილთან ერთად'' მიზანია საქართველოს აგრარულ სფეროში მოქმედი მცირე საწარმოების პოპულარიზაცია და მომხმარებლისთვის გაცნობა. წარმოჩნდეს ისეთი საწარმოები, რომელთაც აქვთ ნატურალური პროდუქტი, მაგრამ არ არიან ცნობილი ბაზარზე, ვერ აკეთებენ ექსპორტს და მომხმარებელი არ იცნობს მათ პროდუქციას.
ღონისძიების ორგანიზატორები არიან ,,გაყიდვების მართვის კომპანია'', რომლის მიერ შექმნილია ნიშანი ,,აირჩიე ქართული'' და ჰიპერმარკეტი ,,გუდვილი'', რომელიც უფასოდ გამოყოფს სივრცეს მცირე მეწარმეებისთვის გამოფენის მიმდინარეობის პერიოდში.
,,ჩვენ ვგეგმავთ, რომ პროექტი გახდეს ყოველწლიური და უფრო ფართომასტაბიანი მომავალში. პროექტი ხელს შეუწყობს ქართული პროდუქციის პოპულარიზაციას, მათ დამკვიდრებას ადგილობრივ ბაზარზე, სავაჭრო ქსელების მხრიდან შეფუთვის და ეტიკეტირების მოთხოვნების გაცნობას და მცირე მეწარმეებში მოტივაციის ამაღლებას შექმნან ახალი პროდუქტები.'' აცხადებენ ორგანიზატორები.