დღეს, 11 დეკემბერს, 11:00 საათზე, "თბილისი მარიოტის" მეფე გიორგის დარბაზში ვისოლ ჯგუფის პრეზიდენტი სოსო ფხაკაძე და EBRD-ის დირექტორი კავკასიას, მოლდოვასა და ბელარუსში პოლ ჰენრი ფორესტერი ურთიერთთანამშრომლობის მემორანდუმს მოაწერენ ხელს, რის საფუძველზედაც სუპერმარკეტი "სმარტი" ქსელის განვითარებისთვის EBRD-ისგან 26 მილიონი დოლარის სესხს მიიღებს.
2015 წლამდე სუპერმარკეტი "სმარტი" 28-მდე სავაჭრო ცენტრს განავითარებს მთელი საქართველოს მასშტაბით. სესხის ნაწილი თანამედროვე მდგრად ენერგო ტექნოლოგიებში ინვესტირებასაც მოიცავს მეტად ეფექტური ენერგომოხმარების მისაღწევად.
უახლოეს თვეებში "სმარტის" სუპერმარკეტები თბილისის სხვადასხვა უბანში, ბათუმში, ქუთაისში და ფოთში გაიხსნება. მომავალი სამი წლის განმავლობაში ვისოლ ჯგუფი "სმარტის" სუპერმარკეტების ქსელის მნიშვნელოვან გაფართოებას გეგმავს და 3000-მდე ადამიანს დაასაქმებს.
ვისოლ ჯგუფმა "სმარტის" ქსელის განვითარება 2010 წელს დაიწყო. "სმარტის" სუპერმარკეტები დღესდღეობით წარმატებით ფუნქციონირებს რუსთაველის გამზირზე (ფოსტის ყოფილ შენობაში), აღმაშენებლის ხეივნის მე-13 კილომეტრზე, ვაზისუბნის მეორე მიკრორაიონში, კახეთის გზატკეცილზე, გუდაურში, ზუგდიდში, მარნეულში, ახალციხეში, ყვარელსა და ჩქაროსნული ავტომაგისტრალის გორის მონაკვეთზე.