სახელმწიფო ხარჯების ანალიზი - ხარჯების მართვა მდგრადი განვითარებისა და ეკონომიკური ზრდისთვის", - აღნიშნულ თემაზე ფინანსთა სამინისტროში მსოფლიო ბანკის წარმომადგენლებმა სპეციალური პრეზენტაცია გამართეს. ანგარიშში განხილულია სახელმწიფო ხარჯების პოლიტიკასთან დაკავშირებული საკითხები და მსოფლიო ბანკის რეკომენდაციები სახელმწიფოსთვის ისეთ პრიორიტეტულ სფეროებში, როგორიცაა პენსიების მატება, სოციალური დახმარება, ჯანდაცვა, ინფრასტრუქტურა, კაპიტალური ხარჯები.
შეხვედრას დაესწრნენ საქართველოს ფინანსთა მინისტრი ნოდარ ხადური, ასევე ენერგეტიკის, ჯანდაცვის, განათლების, ეკონომიკის, ინფრასტრუქტურისა და სოფლის მეურნეობის სამინისტროების წარმომადგენლები.
"საქართველოში მსოფლიო ბანკი ბევრ საინტერესო პროექტს ახორციელებს, მათ შორის, ერთ-ერთი პროექტი შეეხება სახელმწიფო ხარჯების მართვის სისტემის გაუმჯობესებას. ჩვენ მოვისმინეთ ანგარიში იმის შესახებ, თუ რა მდგომარეობაა ამ კუთხით, რასაც გვირჩევენ კოლეგები მსოფლიო ბანკიდან. აღნიშნული პროექტი 6 თვის წინ დასრულდა და ბევრი მიმართულება რეალობას არ ასახავს, თუმცა შევთანხმდით, რომ გავაგრძელებთ თანამშრომლობას, რათა სახელმწიფო ხარჯები უფრო ეფექტურად და გამჭვირვალედ იხარჯებოდეს და ხელი შევუწყოთ საქართველოში ეკონომიკის ზრდას", - განაცხადა
ხადურმა.
"აღნიშნული ანგარიშის მიზანია, წვლილი შეიტანოს საქართველოს სამომავლო ეკონომიკური პოლიტიკის განსაზღვრაში. ფისკალური კონსოლიდაცია საქართველოსთვის მნიშვნელოვანია მაკროეკონომიკური სტაბილურობისა და ძლიერი ეკონომიკური ზრდის მისაღწევად. დოკუმენტის მომზადებისას, ბანკის გუნდს ჰქონდა კონსულტაციები მთავრობის წარმომადგენლებთან, დამოუკიდებელ ექსპერტებთან და დონორებთან. საქართველოსთვის დღეს მნიშვნელოვანია დააბალანსოს ხარჯები რამდენიმე პრიორიტეტულ სექტორს შორის, მოხდეს ხარჯების ეფექტური მართვა 2012-2015 წლებში", - განაცხადა მსოფლიო ბანკის უფროსმა ეკონომისტმა და ანგარიშის ავტორმა ფარუკ ხანმა.
პრეზენტაციას მსოფლიო ბანკის მხრიდან დაესწრნენ მსოფლიო ბანკის რეგიონული დირექტორის მოვალეობის შემსრულებელი ელენე იმნაძე და მსოფლიო ბანკის სხვა წარმომადგენლები.