აჭარაში სუპტროპიკული ხილის გადამუშავება-დაფასოების საწარმო ამოქმედდა. როგორც სააგენტო "ჯი-ეიჩ-ენს" აჭარის სოფლის მეურნეობის სამინისტროდან აცნობეს, რეგიონის სოფლის მეურნეობის მინისტრი ზაურ ფუტკარაძე ქობულეთის მუნიციპალიტეტის სოფელ ჩაისუბანში სუპტროპიკული ხილის გადამუშავება-დაფასოების საწარმოს პრეზენტაციას დაესწრო. საწარმო ამერიკულ-პოლონურ-ქართულმა კომპანიამ "ჰეიფერ ინტერნეიშნლმა" გახსნა.
"ჰეიფერ საქართველო" ქვეყანაში სოფლის მეურნეობის განვითარების ხელშეწყობის სხვადასხვა პროექტს ახორციელებს. აჭარაში ეს მათი პირველი საწარმოა. პროექტის მიზანია დასავლეთ საქართველოში დასაქმებულ მცირე ფერმერთა დახმარება და მათ მიერ წარმოებული ქართული პროდუქციის საზღვარგარეთ გატანა.
პროექტის ბენეფიციარები იქნებიან აჭარის მეციტრუსე და სხვა სუბტროპიკული ხილის მწარმოებელი ფერმერები.
მინისტრის განცხადებით, მსგავსი ახალი საწარმოების ამოქმედება ხელს შეუწყობს სოფლის მეურნეობის განვითარებას და გაზრდის ფერმერთა ფინანსურ შემოსვლებს. აღსანიშნავია ისიც, რომ კომპანიას აქვს ურთიერთობები როგორც უკრაინასთან, ასევე ბელარუსთან და უზრუნველყოფენ პროდუქციის ექსპორტს.