დღეს, ნატოს საბჭომ დადებითად უპასუხა თურქეთის თხოვნას, გადასცეს მას საზენიტო-სარაკეტო კომპლექსი „პეტრიოტი", რომელიც მას სირიის მხრიდან შესაძლო თავდასხმის აღსაკვეთად სჭირდება. ამის შესახებ ნატოს გენერალურმა მდივანმა, ანდერს ფოგ რასმუსენმა განაცხადა.
ნატოს გადაწყვეტილებით უკმაყოფილო დარჩა რუსეთი, რომლის წარმომადგენელმაც ნატოში განაცხადა, რომ იმედი აქვს ალიანსი არ ჩაერევა სირიის კონფლიქტში, ხოლო სარაკეტო სისტემის გადაცემამ, შესაძლოა, კიდევ უფრო მეტი პროვოკაციების საფუძველი გააჩინოს სირია-თურქეთის საზღვარზე, მით უმეტეს, რომ სირია ახლა არ არის იმ მდგომარეობაში, რომ მეზობელს თავს დაესხას.
როგორც ცნობილია, თურქეთი ჩრდილოატლანტიკური ალიანსისაგან სარაკეტო-საზენიტო კომპლექსის გადაცემას უკანასკნელი კვირების განმავლობაში ითხოვდა. ეს მოთხოვნა კი განპირობებული იყო იმით, რომ ბოლო ხანებში ორი ქვეყნის საზღვარზე ინციდენტები მომრავლდა, რის დროსაც სირიის მხრიდან თურქეთის სასაზღვრო ტერიტორია რამდენჯერმე დაიბომბა.