ამერიკის შეერთებული შტატების სახელმწიფო მდივანმა, ჰილარი კლინტონმა, სირიის ხელისუფლების მოქმედებას სირიელი ხალხის წინააღმდეგ, "ტრაგიკული" უწოდა. პრაღაში, ჟურნალისტების წინაშერ გამოსვლისას აშშ-ის სახელმწიფო მდივანმა ოფიციალური დამასკო გააფრთხილა, რომ თუ ეს უკანასკნელი ქიმიურ იარაღს გამოიყენებს, ეს მისთვის "წითელი ხაზის" გადაკვეთის ტოლფასი იქნება, რის შემდეგაც ასადის ხელისუფლება ვაშინგტონის საპასუხო ნაბიჯს უნდა ელოდოს.
"არ დავაკონკრეტებ მოქმედების დეტალებს, რომელსაც განვახორციელებთ იმ შემთხვევაში, თუ ჩვენ გვექნება მტკიცებულებები ასადის მხრიდან საკუთარი ხალხის წინააღმდეგ ქიმიური იარაღის გამოყენების შესახებ, მაგრამ ის დაზუსტებით შემიძლია ვთქვა, რომ თუ ეს მოხდება, ჩვენ რადიკალურ ზომებს მივიღებთ," - განაცხადა ჰილარი კლინტონმა.
სირიული კრიზისის მთელი პერიოდის განმავლობაში, რომელიც 20 თვეა გრძელდება, დასავლური ქვეყნები პირდაპირი სამხედრო ჩარევისაგან თავს იკავებდნენ, თუმცა, თუ სირია ქიმიურ იარაღს გამოიყენებს, ეს პასუხის გარეშე არ დარჩება.
ამას გარდა, სირიელი ოპოზიციონერები იუწყებიან, რომ სახელისუფლო ძალებმა კიდევ ერთხელ დაცხრილეს დამასკოს გარეუბანი. ამბოხებულების მიერ კონტროლირებული რაიონები საჰაერო და სარაკეტო შეტევის ობიექტი გახდა. ოპოზიცია, რომელიც პრეზიდენტ ასადის წინააღმდეგ გამოდის, ცდილობს დამასკოს გარშემო რკალი შეავიწოვოს, რაც მათ პოზიციებს მნიშვნელოვნად გაამყარებს.
ამას გარდა, ამერიკის შეერთებული შტატების სახელმწიფო დეპარტამენტმა გამოთქვა იმედი, რომ ნატო მხარს დაუჭერს თურქეთ-სირიის საზღვარზე "პეტრიოტის" სისტემის რაკეტების განთავსებას. როგორც ცნობილია, თურქეთმა ალიანსს უკვე მიმართა ამ თხოვნით. თუ ნატო თურქეთის ამ სურვილს დათანხმდება, სარაკეტო სისტემა საზღვარზე რამდენიმე კვირაში განთავსდება. ეს საკითხი ნატოს წევრი ქვეყნების საგარეო საქმეთა მინისტრების შეხვედრაზე, ბრიუსელში, დღეს ან ხვალ უნდა გადაწყდეს.