საქართველოს პრეზიდენტის გადაწყვეტილებით, გიორგი კალანდაძე შეიარაღებული ძალების გაერთიანებული შტაბის ბრიგადის გენერლის რანგში კვლავ განაგრძობს შეიარაღებულ ძალებში სამსახურს. ქვეყნის პირველი პირი გიორგი კალანდაძეს დღეს პრეზიდენტის სასახლეში შეხვდა. საუბრისას მიხეილ სააკაშვილმა კიდევ ერთხელ მოუწოდა, რომ საქართველოს შეიარაღებულ ძალებს პატივი უნდა სცეს ყველა ადამიანმა.
,,ჩვენ შევქმენით ისეთი შეიარაღებული ძალები, რომელზეც ეს პოლიტიკური კონიუნქტურა ვერანაირად ვერ იმოქმედებს, იმ გაგებით, რომ ისინი ემსახურებიან არა რომელიმე პარტიას, მთავრობას ან რომელიმე პრეზიდენტს, არამედ ისინი ემსახურებიან ქართველ ხალხს. მთავარია ჩვენი ქვეყანა იყოს დაცული. ჩემი რჩევა იქნება, რომ ეს ყველაფერი მოვიტოვოთ უკან, დაბრუნდით გენშტაბში და გააგრძელეთ სამშობლოსათვის ისეთივე ერთგული სამსახური, როგორითაც გასული წლების განმავლობაში საქმიანობდით'' - განაცხადა მიხეილ სააკაშვილმა.
შეგახსენებთ, რომ , გიორგი კალანდაძე გირაოთი გათავისუფლებულდა. მან საპყრობილე გირაოს - 20 ათასი ლარის გადახდის სანაცვლოდ გამთენიისას დატოვა.
გიორგი კალანდაძეს ბრალად ედება: მოხელის მიერ სამსახურებრივი უფლებამოსილების გადამეტება, რამაც ფიზიკური პირის უფლების და სახელმწიფოს კანონიერი ინტერესების არსებითი დარღვევა გამოიწვია, ჩადენილი ძალადობით და დაზარალებულის პირადი ღირსების შეურაცხყოფით;
წარდგენილი ბრალდების თანახმად:
2011 წლის ოქტომბრის თვეში საქართველოს თავდაცვის მინისტრმა ბაჩანა ახალაიამ, საქართველოს შეიარაღებული ძალების გაერთიანებული შტაბის უფროსის მოადგილემ გიორგი კალანდაძემ და მეოთხე ქვეითი ბრიგადის მეთაურმა ზურაბ შამათავამ, თავდაცვის მინისტრის კაბინეტში სიტყვიერი და ფიზიკური შეურაცხყოფა მიაყენეს შეიარაღებული ძალების ხუთ სამხედრო მოსამსახურეს, ბრალდებულებმა იმავე დღეს ვაზიანში დისლოცირებულ მეოთხე ქვეითი ბრიგადის ტერიტორიაზე სამხედრო მოსამსახურეთა თანდასწრებით კვლავ მიაყენეს სიტყვიერი და ფიზიკური შეურაცხყოფა ამავე სამხედრო მოსამსახურეებს, ხოლო შემდეგ აღნიშნულ ხუთ პირს სამხედრო პოლიციის დეპარტამენტის შენობაში მუქარით დააწერინეს პატაკი შეიარაღებული ძალებიდან დათხოვნის თაობაზე და ახსნა-განმარტება თითქოს ამზადებდნენ სამხედრო ნაწილში არეულობას და ჩააყენეს პირადი ღირსების შეურაცხმყოფელ მდგომარეობაში.
ასევე, 2011 წლის 13 სექტემბერს, გამთენიისას ბაჩანა ახალაიამ, სხვა პირების დახმარებით ქ. თბილისში მდებარე ერთ-ერთ რესტორანში სიტყვიერი და ფიზიკური შეურაცხყოფა მიაყენა ფიზიკურ პირს და მუქარით მოსთხოვა მის საკუთრებაში მყოფი ავტომანქანა "ბმვ X-6" ეჩუქებინა სასჯელაღსრულების დეპარტამენტისთვის, რასაც ეს უკანასკნელი დაეთანხმა. მანქანის გადაცემის შემდეგ, ბაჩანა ახალაიას დავალებით, აღნიშნული პირი წაიყვანეს ქ. თბილისში, მუხიანის დასახლებაში სადაც უკანონოდ აღუკვეთეს თავისუფლება 2011 წლის 13 სექტემბრის 21 საათამდე, ხოლო შემდეგ დაუბრუნეს კუთვნილი ავტომანქანა და გააფრთხილეს აღნიშულ საკითხზე არაფერი ეთქვა.
შუამდგომლობის განხილვისას დაცვის მხარე არ დაეთანხმა ბრალდების მხარის შუამდგომლობას და ბრალდებულთა მიმართ არასაპატიმრო სახის აღკვეთის ღონისძიების გამოყენება მოითხოვა.
სასამართლომ აღკვეთის ღონისძიების კონკრეტული სახის შერჩევისას, მხედველობაში მიიღო ბრალდებულების მიმართ წარდგენილი ბრალდების სიმძიმე, მათი მხრიდან მიმალვისა და მოწმეებზე ზემოქმედების საფრთხე, განხორციელებული ქმედების ხასიათი და გამოწვეული შედეგი, ასევე ბრალდებულთა წარსული საქმიანობა.
ზემოაღნიშნულიდან გამომდინარე, სასამართლომ ბრალდებულ ბაჩანა ახალაიას აღკვეთის ღონისძიების სახით შეუფარდა პატიმრობა, ხოლო ბრალდებულებს ზურაბ შამათავას და გიორგი კალანდაძეს აღკვეთის ღონისძიების სახით შეეფარდა გირაო თითოეულს 20 000 ლარის ოდენობით, გირაოს სრული მოცულობით გადახდის შემთხვევაში გიორგი კალანდაძე და ზურაბ შამათავა გათავისუფლდებიან პატიმრობიდან.
აღნიშნულ საქმეზე წინასასამართლო სხდომა გაიმართება თბილისის საქალაქო სასამართლოში, 2012 წლის 25 დეკემბერს 15 საათზე.
