ამერიკის შეერთებულ შტატებში ხელისუფლების "პოლიტიკური დინასტიის" გზით გადაცემის ტრადიცია, შესაძლოა, კვლავ გაგრძელდეს. ამერიკელი პოლიტოლოგების ნაწილი პროგნოზირებს, რომ 2016 წლის შეერთებული შტატების საპრეზიდენტო არჩევნებზე, ერთმანეთის მოწინააღმდეგეები, შესაძლოა, აშშ-ის ყოფილი პირველი ლედი და ექსსახელმწიფო მდივანი, ჰილარი კლინტონი (დემოკრატიული პარტიიდან) და ფლორიდის ექს-გუბერნატორი, ჯორჯ ბუშ-უფროსის ვაჟი და ჯორჯ ბუშ-უმცროსის ძმა, ჯებ ბუში გახდნენ (რესპუბლიკური პარტიიდან). ამის შესახებ გაზეთი Politico წერს.
ექსპერტები აღნიშნავენ, რომ კლინტონის შანსები გახდეს თეთრი სახლის დიასახლისი და ამერიკის შეერთებული შტატების ისტორიაში პირველი ქალი პრეზიდენტი, საკმაოდ მაღალია. მისი პოლიტიკური რეიტინგი საკმაოდ გაიზარდა სახელმწიფო მდივნის პოსტზე ოთხწლიანი მოღვაწეობის შემდეგ, პრეზიდენტ ობამას პირველი ვადით პრეზიდენტობის დროს.
შეგახსენებთ, რომ ჰილარი კლინტონი უკვე იყო საპრეზიდენტო კანდიდატი, თუმცა მან კონკურენტს პრაიმერიზში ვერ აჯობა. ბევრი იმთავითვე მიიჩნევდა, რომ მაშინ გამარჯვებული ობამა, რომელიც აშშ-ის ისტორიაში პირველი მუქკანიანი პრეზიდენტი გახდა, კლინტონს ვიცე-პრეზიდენტის თანამდებობას მისცემდა, თუმცა, მან ამ თანამდებობაზე ჯოზეფ ბაიდენი დანიშნა, რომელსაც, როგორც "გარდიანი" წერს, შესაძლოა, თავადაც მოესურვოს 2016 წლის საპრეზიდენტო არჩევნებში მონაწილეობა.
რაც შეეხება ჯებ ბუშს, მისი შანსები, გახდეს აშშ-ის მომავალი პრეზიდენტი, ასევე, საკმაოდ მაღალია. იმ ფაქტორებს შორის, რომელიც ბუშების ოჯახს მისცემს შესაძლებლობას კიდევ ერთხელ დაიკავონ თეთრი სახლი, ექსპერტები ასახელებენ ჯების დიდ პოლიტიკურ კავშირებს ფლორიდაში, რომელიც ერთ-ერთი გადამწყვეტი შტატია ხმის მიცემის დროს. ასევე, რეპუბლიკელები დიდი პოპულარობით სარგებლობენ ეთნიკურ მექსიკელებს შორის, რომლებიც ამერიკის შერთებულ შტატებში საკმაოდ დიდი რაოდენობით არიან. ჯებ ბუშს ასევე დიდი შანსი აქვს, საარჩევნო კამპანიის საწარმოებლად დიდი რაოდენობით თანხა მოაგროვოს. რესპუბლიკური პარტიის ერთ-ერთი სტრატეგი ალექს კასტელანოსი მიიჩნევს, რომ ხალხს ძალიან უყვარს ბრენდები, პოლიტიკური დინასტიები. სწორედ ასეთი ბრენდები არიან კლინტონი და ბუში, რაც ნებისმიერი მათგანის წარმატების საფუძველი შეიძლება გახდეს.
