2012 წლის სექტემბერში საქართველოს სტატისტიკური სისტემის გლობალური შეფასების მიზნით საქსტატში ერთკვირიანი ვიზიტით საერთაშორისო მისია იმყოფებოდა. მისიის შემადგენლობაში შედიოდნენ როგორც საერთაშორისო ორგანიზაციების - ევროკომისიის (ევროსტატის) და გაეროს ევროპის ეკონომიკური კომისიის, ისე ევროკავშირის ცალკეული ქვეყნების სტატისტიკური უწყებების წარმომადგენლები.
მისიის მიზნებს წარმოადგენდა საქართველოს სტატისტიკური სისტემის ევროპული სტანდარტებისადმი შესაბამისობის დონის განსაზღვრა.
მისიის თბილისში ყოფნის დროს გაიმართა სამუშაო შეხვედრები როგორც ოფიციალური სტატისტიკის ძირითადი მწარმოებლების, ისე არასამთავრობო სექტორისა და სამეცნიერო წრეების წარმომადგენლებთან.
მისიამ უკვე მოამზადა მოხსენების შუალედური ვერსია, რომელშიც ჩამოყალიბებულია რეკომენდაციები, რომელთა შესრულება ხელს შეუწყობს ქვეყნის სტატისტიკური სისტემის შემდგომ განვითარებასა და ევროპულ სტანდარტებთან მის დაახლოებას. საბოლოო მოხსენება, სადაც ხაზგასმული იქნება ძირითადი რეკომენდაციები, განთავსდება საქსტატის ვებგვერდზე და ხელმისაწვდომი იქნება ნებისმიერი მომხმარებლისთვის.
შეგახსენებთ, რომ გასულ წელს საქართველოს ეკონომიკური და ფინანსური სტატისტიკა უკვე შეაფასა საერთაშორისო სავალუტო ფონდმა. შეფასების დოკუმენტი განთავსებულია როგორც სავალუტო ფონდის, ასევე საქსტატის ვებ-გვერდზე.
