საქართველო კვლავ განაგრძობს აქტიურ თანამშრომლობას სტრატეგიულ პარტნიორთან - ამერიკის შეერთებულ შტატებთან. მიმდინარე წლის 31 ოქტომბერს ფინანსთა სამინისტროში საქართველოს ფინანსთა მინისტრმა ნოდარ ხადურმა გაცნობითი ხასიათის შეხვედრა გამართა ამერიკის შეერთებული შტატების ელჩთან რიჩარდ ნორლანდთან.
შეხვედრას დაესწრნენ საქართველოში სამუშაო ვიზიტად მყოფი Millennium Challenge Corporation-ის ვიცე-პრეზიდენტი ტომ ჰარლი, Millennium Challenge Corporation-ის წარმომადგენელი საქართველოში ჯეიმს მაკნიკოლასი, ამერიკის შეერთებული შტატების საერთაშორისო განვითარების სააგენტოს (USAID) დირექტორი საქართველოში სტივენ ჰეიკიმი.
ფინანსთა მინისტრმა სტუმრებს ოფიციალურად წარუდგინა მინისტრის ახალი მოადგილეები და გააცნო ის სფეროები, რომლებსაც ისინი გაუწევენ კურირებას. ნოდარ ხადურმა ღრმა მწუხარება გამოხატა ჩრდილოეთ ამერიკაში მიმდინარე სტიქიური უბედურების გამო და სამძიმარი გამოუცხადა დაღუპულთა ოჯახებს.
ფინანსთა მინისტრის განცხადებით, საუბარი შეეხო მომავალი წლის გეგმებს, მათ შორის, ათასწლეულის გამოწვევის ახალი პროგრამის განხორციელებას, რომელიც საქართველოს განათლების სფეროს მოხმარდება. „ღრმად ვარ დარწმუნებული, რომ საქართველოსა და ამერიკის შეერთებული შტატების თანამშრომლობა ამ მიმართულებით გაგრძელდება და ის უფრო ნაყოფიერი და ეფექტიანი იქნება და რაც მთავარია, ჩვენ ხარისხობრივ შედეგს მივიღებთ, " - განაცხადა ფინანსთა მინისტრმა.
„დღევანდელი შეხვედრა კარგი შესაძლებლობა იყო ამერიკის შეერთებული შტატების საელჩოს თანამშრომლებისთვის, რათა გავცნობოდით ახალდანიშნულ ფინანსთა მინისტრს და მის გუნდს. ამ გარდამავალ პერიოდში ჩვენ მხარს ვუჭერთ ფინანსურ სტაბილურობას და კმაყოფილები ვართ მიმდინარე პროცესით. ერთ-ერთი უმნიშვნელოვანესი პროექტი, რომელსაც აშშ საქართველოში ახორციელებს გახლავთ ათასწლეულის გამოწვევის კორპორაციის პროგრამა," - განაცხადა აშშ-ს ელჩმა.
როგორც Millennium Challenge Corporation-ის ვიცე-პრეზიდენტმა ტომ ჰარლიმ აღნიშნა ათასწლეულის გამოწვევის კორპორაცია კმაყოფილია შეხვედრით, რომელიც შედგა ფინანსთა მინისტრთან. „მინდა დავადასტურო ჩვენი პოზიცია, რომ საქართველოს მთავრობასთან დადებული მეორე კომპაქტი გაგრძელდება და შესრულდება. მიუხედავად იმისა, რომ წინა წლებში პროგრამის ფარგლებში ხორციელდებოდა გზებისა და სოფლის მეურნეობის პროექტები, ამჟამინდელი კომპაქტი უფრო მეტად იქნება კონცენტრირებული განათლების სფეროზე," - Millennium Challenge Corporation-ის ვიცე-პრეზიდენტმა.
შეხვედრაზე მხარეებმა ასევე იმსჯელეს USAID-ის ფინანსური მხარდაჭერით განხორციელებული პროექტების მიმდინარეობაზე, განიხილეს სამომავლო პერსპექტივა თანამშრომლობის გაუმჯობესების მიმართულებით.
მასალის გამოყენების პირობები
