ქართული მხარე არ გამორიცხავს, რომ ქართული პროდუქციის რუსეთის ბაზარზე დასაბრუნებლად სპეციალური სამუშაო ჯგუფი შეიქმნას. როგორც დღეს სოფლის მეურნეობის მინისტრმა დავით კირვალიძემ განაცხადა, პრემიერ-მინისტრთან შეხვედრისას საუბარი იყო ქართული პროდუქციის რუსულ ბაზარზე დაბრუნებაზე.
"რამდენიმე დღის წინ გარკვეული განცხადება გააკეთა გენადი ონიშენკომ. მან განაცხადა, რომ თუ ქართული მხარე მოისურვებდა, მაშინ შესაძლებელი გახდებოდა ქართული პროდუქცია რუსეთის ბაზარზე დაბრუნებულიყო. მოგეხსენებათ, რუსული ბაზარი ხელწამოსაკრავი არ არის და ის ჩვენთვის მნიშვნელოვანი ბაზარია, ამიტომ არ გამოვრიცხავ, რომ ამ მიმართულებით სამუშაო ჯგუფი შეიქმნას", - განცხადა კირვალიძემ.
მინისტრის თქმით, თუ რუსული მხარე მოისურვებს და რუსი ექსპერტები საქართველოში სიტუაციის შესასწავლად ჩამოვლენ, ამას ქართული მხარე მხოლოდ მიესალმება და ხელს შეუწყობს მათ საქართველოში მუშაობას.
შეგახსენებთ, რომ რამდენიმე დღის წინ "როსპოტრებნადზორის" ხელმძღვანელმა გენადი ონიშენკომ განაცხადა, რომ მისი უწყება მზად არის მოთხოვნის განსახილველად, რომელიც რუსეთის ბაზარზე ქართული ღვინოებისა და მინერალური წყლის დაშვებას ეხება. მისი თქმით, "როსპოტრებნადზორი" ქართული მხრიდან მხოლოდ ოფიციალურ მოთხოვნას ელოდება. ასევე აუცილებელი პირობაა უწყების სპეციალისტების საქართველოში ჩასვლა, რომლებიც ადგილობრივი დაწესებულებების ინსპექტირებას განახორციელებენ.
"როსპოტრებნადზორის" ხელმძღვანელი ასევე აცხადებდა, რომ საქართველოს ახალი ხელისუფლების პოზიცია ჯერჯერობით გაურკვეველი რჩება, თუმცა თუ ადგილობრივ ბიზნესს უნდა რუსეთის ბაზარზე მოსვლა და ხელისუფლება მათ ამაში ხელს არ შეუშლის - ამის განხილვა უკვე პოზიტიურ წინაპირობად შეიძლება.
