ღაზას სექტორში ისრაელის ავიაციის მიტანილი იერიშის შედეგად ერთი ადამიანი დაიღუპა და ერთი დაიჭრა. წინასწარი ინფორმაციით დაღუპული , სავარაუდოდ, "ჰამასის" წევრი იყო.
ისრაელის ავიაცმიამ ღაზას სექტორზე იერიში მას შემდეგ მიიტანა, რაც პალესტინელმა ბოევიკებმა ისრაელის ტანკების მიმართულებით ნაღმტყორცნები ისროლეს.
შეგახსენებთ, რომ 24 ოქტომბერს ისრაელის ხელისუფლება და ღაზას სექტორში ხელისუფლებაში მყოფი მოძრაობა ჰამასის ხელმძღვანელობა, ეგვიპტის შუამავლობით გამართულ არაოფიციალურ მოლაპარაკებებში, ცეცხლის შეწყვეტაზე შეთანხმდნენ.
შეთანხმება მიღწეულ იქნა იმ ვითარებაში, როდესაც დაპირისპირება მხარეებს შორის კვლავ გამწვავდა. 22 ოქტომრიდან ისრაელის საჰაერო ძალების მიერ მიტანილი იერიშის შედეგად ჰამასის ექვსი ბოევიკი დაიღუპა.
ისრაელის ხელისუფლების განმარტებით, ბოლო დღეების განმავლობაში ღაზას სექტორიდან ისრაელის მიმართულებით 70 რაკეტა იქნა გაშვებული, რის შედეგადაც ხუთი ადამიანი დაიჭრა, სამი მათგანი კრიტიკულ სიტუაციაში იმყოფება.
