საქართველოში იაპონიის საგანგებო და სრულუფლებიანი ელჩი ღირსების ორდენით დაჯილდოვდა. საგარეო საქმეთა სამინისტროს ინფორმაციით, უწყების პირველმა პირმა გრიგოლ ვაშაძემ საქართველოს პრეზიდენტის სახელით მასაიოში კამოჰარას გადასცა საქართველოს სახელმწიფო ჯილდო - ღირსების ორდენი, მისი მოღვაწეობის პერიოდში საქართველო-იაპონიის ორმხრივ ურთიერთობებში შეტანილი განსაკუთრებული წვლილისთვის.
ვაშაძემ ხაზი გაუსვა იაპონიის განუხრელ მხარდაჭერას საქართველოსადმი ქვეყნისთვის უმძიმეს პერიოდში - 2008 წლის ომის დროს და გამოხატა მადლიერება იაპონიისადმი საქართველოში მასშტაბური ტექნიკური თუ ინფრასტრუქტურული პროექტების დაფინანსებისთვის.
