"ახალგაზრდებს ქართული მხარე შეპირდა ჩეჩნეთში გადაყვანას. სპეციალურად ამისათვის მისცეს იარაღი, მერე კი დაუნაღმეს გზა და ალყაში მოაქციეს, - აცხადებს გაზეთი "რეზონანსისთვის" მიცემულ ინტერვიუში იჩქერიის პირველი პრეზიდენტის, ჯოხარ დუდაევის დისშვილი უამარ იდიგოვი.
მისი თქმით, დაიღუპა 12 კაცი. მათ შორის ექიმი და მეგზური ოფიცერი, რომლებიც ქართული სპეცსამსახურის წარმომადგენლებმა გამოაყოლეს, თავიდანვე მოკლეს, რომ მოწმე არ დარჩენილიყო.
"ბაჩო ახალაიამ მისცა იარაღი. ეს ყველაფერი კი, რაც სააკაშვილმა და მისმა „კამანდამ" გააკეთა და რაზეც მე გელაპარაკეთ, მხოლოდ დასაწყისია. მე ვაპირებ ყველაფერი ვთქვა ფაქტებითა და მტკიცებულებებით, თუ ვინ ჩამოიყვანა ისინი ავსტრიიდან, ვინ შეხვდა მათ აეროპორტში, ვინ დააკვალიანა", - ყველაფერს, ყველაფერს ნათელს მოვფენ. ბატონმა ბიძინა ივანიშვილმა თქვა, რომ ამის შესახებ მას ცოტა ინფორმაცია აქვს, ამიტომაც მე მას ყველანაირი ინფორმაცია უკვე მივაწოდე. თუკი ვინმეს ეჭვი ეპარება ამაში, შეამოწმონ ყველაფერი - ვინ მოვიდა, ვინ წავიდა, ვინ დარეკა, რატომ მოხდა ეს ყველაფერი", - აცხადებს უამარ იდიგოვი.
შეგახსენებთ, რომ ლაფანყურთან ახლოს, მდინარე ლოპოტის ხეობაში საქართველოს შსს-მ ანტიტერორისტული ოპერაცია 28 აგვისტოს დაიწყო. შსს-ს ინფორმაციით, სპეცოპერაცია ლაფანყურის ტყიდან 5 ახალგაზრდის გატაცებას მოჰყვა. ოფიციალური ცნობით, ახალგაზრდები 26 აგვისტოს დაიკარგნენ. შსს ირწმუნება, რომ შეიარაღებულმა ჯგუფმა ახალგაზრდები მძევლებად აიყვანა. შსს-ს 29 აგვისტოს ინფორმაციით, ოპერაციისას დაიღუპა შსს-ს ორი თანამშრომელი და სამხედრო ექიმი, დაიჭრა 5 ქართველი სპეცრაზმელი. შს მინისტრის მაშინდელმა მოადგილემ შოთა ხიზანიშვილმა 29 აგვისტოს თელავში გამართულ ბრიფინგზე განაცხადა, რომ 11 დივერსანტი ლიკვიდირებულია, 6 კი - ალყაშია. შსს-ვე ცნობით 11 ლიკვიდირებულიდან 7-ის იდენტიფიცირება მოხდა, მათგან ორი, 22 წლის ასლან მარგოშვილი და 26 წლის ბაჰაუდინ ალდამოვი საქართველოს მოქალაქეები აღმოჩნდნენ, დანარჩენი 5 კი რუსეთის. გარდაცვლილთა ოჯახებს რამდენიმე დღის განმავლობაში ცხედრებს არ აძლევდნენ. საბოლოოდ, ასლან მარგოშვილი, ბაჰაუდინ ალდამოვი და ბაჰაუდინ ბაღაკაშვილი პანკისის ხეობაში სოფელ დუისის სასაფლაოზე დაკრძალეს. შსს-ს ინფორმაციით, დაკავებულია 1 ადამიანი, ახმედ ჩატაევი, ჩრდილოკავკასიელი ისლამისტური მოძრაობის ლიდერის დოკუ უმაროვის პირადი წარმომადგენელი ევროპაში.
ახალგაზრდები რომლებიც შსს-ს მიერ გავრცელებული ინფორმაციით, დაჯგუფებამ მძევლად აიყვანა, ლოპოტის ხეობაში განვითარებულ მოვლენებზე ჟურნალისტებთან არ საუბრობენ. ისინი დუმილს იმით ხსნიან, რომ სამართალდამცავებისგან ამ საკითხზე ჟურნალისტებთან ლაპარაკი აკრძალული აქვთ.
