სწორედ რუსეთთან პოლიტიკური დიალოგით ჩვენ საქართველო უკანონო საოკუპაციო ჯარებისგან უნდა გავწმინდოთ. აცხადებს გაზეთ "იზვესტიასათვის" მიცემულ ინტერვიუში თავდაცვის მინისტრობის კანდიდატი ირაკლი ალასანია.
მისივე თქმით, საქართველოს ახლანდელ პრეზიდენტს მიხეილ სააკაშვილს ჯერ კიდევ 2004-2005 წლებში ყველა შანსი ჰქონდა იმისათვის, რომ რუსეთთან ურთიერთობა დაერეგულირებინა და აფხაზებთან და ოსებთან დიალოგი დაეწყო.
"იმ წლებში საბრძოლო მოქმედებების განუახლებლობისა და ქართველი დევნილების დაბრუნების შესახებ ხელშეკრულების გაფორმება დიდ პერსპექტივებს ქმნიდა აფხაზებთან და ოსებთან ახალი ურთიერთობებს დაწყებისათვის და პარალელურად რუსეთთან ურთიერთობის ნორმალიზაციისათვის. სააკაშვილმა ეს შანსი ხელიდან გაუშვა და მე დაწმუნებული ვარ, რომ საქართველოს ახალ ხელისუფლებას ეს შანსი კვლავ გაუჩნდება", _ აცხადებს ალასანია და აღნიშნავს, რომ ყოველივე ამის განხორციელება სწორი მიდგომით შეიძლება.
"რუსეთთან პოლიტიკური დიალოგის აღდგენა -ევროკავშირის მონაწილეობით, განსაკუთრებით გერმანიის, ჩვენი პირდაპირი კონტაქტები აფხაზებთან და ოსებთან სავაჭრო და ინფრასტრუქტურული პროექტების აქცენტით, ყველაფერი ეს საქართველოს ევროინტეგრაციისკენ მიმართულებასთან ერთად - ახალ პერსპექტივებს გახსნის.
რუსეთს არ სურს საქართველოს ხილვა ნატოში? რუსეთს ხომ არც ბალტიისპირეთის სახელმწიფოების ხილვა უნდოდა იქ, მაგრამ მათ რუსეთისათვის ისეთი საშუალება არ მიუციათ, როგორიც თავისი არაშორსმჭვრეტელი პოლიტიკითა და სამხედრო რიტორიკით მიხეილ სააკაშვილმა მისცა.
სწორედ რუსეთთან პოლიტიკური დიალოგით ჩვენ უნდა გავწმინდოთ საქართველო უკანონო საოკუპაციო ჯარებისგან. ამ პრობლემას სამხედრო გადაწყვეტა არ აქვს", _ განაცხადა ირაკლი ალასანიამ.