ჟენევის საერთაშორისო მოლაპარაკებების 21-ე რაუნდზე უპასუხოდ დარჩა ქართული მხარის წინადადება, რომელიც გარკვეული კატეგორიის პირებისთვის საოკუპაციო ხაზის მეორე მხარეს არსებულ სასაფლაოებზე, კულტურულ და რელიგიურ ადგილებზე, ჰუმანიტარული ვიზიტების განხორციელების შესაძლებლობის მიცემას ითვალისწინებდა. ინფორმაციას ამის შესახებ საქართველოს საგარეო უწყება ავრცელებს.
"პროგრესი არ დაფიქსირებულა ლტოლვილთა და იძულებით გადაადგილებულ პირთა საკითხებთან მიმართებაში. სოხუმისა და ცხინვალის წარმომადგენლები კვლავაც აგრძელებდნენ ამ უმნიშვნელოვანესი ჰუმანიტარული საკითხების დაბლოკვას.
უპასუხოდ დარჩა საქართველოს მხარის წინადადება, რომელიც შეეხებოდა მოლაპარაკებათა წინა რაუნდზე გარკვეული კატეგორიის პირებისთვის საოკუპაციო ხაზის მეორე მხარეს არსებულ სასაფლაოებზე, კულტურულ და რელიგიურ ადგილებზე ჰუმანიტარული ვიზიტების განხორციელების შესაძლებლობის მიცემას', _ იუწყება საქართველოს საგარეო საქმეთა სამინისტრო და აღნიშნავს, რომ ქართული მხარის წარმომადგენლებმა მოლაპარაკებათა თანათავმჯდომარეებს მიაწოდეს მონაცემები ოკუპირებულ ტერიტორიებზე მცხოვრებ პირთა უფლებების დარღვევასთან დაკავშირებით, მათ შორისა ისეთ უფლებებზე, როგორიც არის მშობლიურ ენაზე განათლების მიღების უფლება, თავისუფლება დევნისა და თვითნებური დაკავებისგან, გადაადგილების თავისუფლება.
"განსაკუთრებით მწვავე შეშფოთება გამოითქვა ლეონიდ თიბილოვის მიერ მედიისთვის გაკეთებულ განცხადებებთან დაკავშირებით, რომლებიც შეეხებოდა ქართული ნასოფლარების განადგურების გეგმებს. გაჟღერდა მოწოდება უზრუნველყოფილ იქნას ადგილზე ადამიანის უფლებათა მდგომარეობის საერთაშორისო მონიტორინგი. თანათავმჯდომარეებმა აღნიშნეს, რომ აუცილებელია გაიგზავნოს პოზიტიური სიგნალი კონფლიქტით დაზარალებული მოსახლეობისათვის, რისთვისაც ყველა მხარემ მკაფიოდ უნდა დაადასტუროს ადამიანის უფლებათა და თავისუფლებათა მთავარი პრინციპებისადმი ერთგულება", _ იუწყება საქართველოს საგარეო უწყება.
ჟენევის საერთაშორისო მოლაპარაკებების რიგით 22-ე რაუნდი 2012 წლის დეკემბერში გაიმართება.
