ლოპოტის ხეობაში დაკავებული ახმედ ჩატაევი, რომელიც „კავკასიის იმარათის" ხელმძღვანელის დოკუ უმაროვის პირადი წარმომადგენელია ევროპის ქვეყნებში, ციხის საავადმყოფოშია მოთავსებული. ამის შესახებ კახეთის საინფორმაციო ცენტრს სასჯელაღსრულების, პრობაციისა და იურიდიული დახმარების საკითხთა სამინისტროში განუცხადეს.
კახეთის საინფორმაციო ცენტრი რამდენიმე დღის განმავლობაში ცდილობდა დაედგინა ახმედ ჩატაევის ადგილსამყოფელი. შს სამინისტრო და თბილისის საქალაქო სასამართლო არ ამხელდნენ ინფორმაციას, ლოპოტას ხეობაში სპეცოპერაციის შედეგად დაკავებული ახმედ ჩატაევის ადგილსამყოფელის თაობაზე.
სექტემბრის შუა რიცხვებში გავრცელდა ინფორმაცია, რომ ახმედ ჩატაევი რუსეთს გადასცეს, რაც კახეთის საინფორმაციო ცენტრს საქართველოს იუსტიციის სამინისტრომ არ დაუდასტურა.
ახმედ ჩატაევი დაკავებამდე პანკისის ხეობაში ცხოვრობდა მეუღლესთან, ალინასთან ერთად. ჩატაევის დაკავების შემდეგ მისმა მეუღლემ პანკისის ხეობა დატოვა. ერთ-ერთი ვერსიით, ის თურქეთში გაემგზავრა.