არსებული შრომის კოდექსი გადასაგდებია, - განუცხადა "ქართული ოცნების" ოფისში ჟურნალისტებს ახალი მოწვევის პარლამენტის ეკონომიკური განვითარების კომიტეტის თავმჯდომარეობის კანდიდატმა ნოდარ ხადურმა.
მისი თქმით, დაიწერება ახალი კოდექსი, რომელიც ორმაგი ინტერპრეტაციის საშუალებას აღარავის მისცემს.
"დაქირავებულს არანაირი უფლება არ აქვს. ჩვენ შევეცდებით ისეთი კოდექსი მივიღოთ, როდესაც ადამიანს ერთი თვით ადრე მაინც ეცოდინება, რომ სამსახურიდან ათავისუფლებენ და შეძლებს ამ დროში მეორე სამსახურის მოძებნას. არსებული შრომის კოდექსი გადასაგდებია, ახალს დავწერთ. ახალი კოდექსი კი ორმაგი ინტერპრეტაციის საშუალებას აღარ მისცემს არავის", - განაცხადა ხადურმა.
მისი შეფასებით, დღეს საქართველოში არსებული შრომის კოდექსი ევროპელთა შეფასებით, აკანონებს ქვეყანაში მონურ შრომას.
