გლდანის მე-8 საპყრობილის ყოფილი თანამშრომელი ვლადიმერ ბედუკაძე პატიმრების წამების ამსახველი კადრების გავრცელებას ნანობს, - ამის შესახებ ბედუკაძემ გაზეთ "რეზონანსთან" ინტერვიუში განაცხადა.
"მეზიზღება საკუთარი თავი. ნეტა არ გადამედგა ეს ნაბიჯი. ვნანობ. ეკლათ და ეხოცათ. სიზმარში მგონია თავი.პასუხისმგებლობას თავს არანაირად არ ვარიდებ. მეც სისტემის ნაწილი ვიყავი, როგორც ყველა 4500 თანამშრომელი. აქ ყველა ჯალათი არაა, მაგრამ ის 20%, ვისაც ბრალი ბიჭების წამებაში ედება, სამაგალითოდ უნდა გასამართლდეს. საკუთარ დედას გამოჭრიდნენ ყელს, ოღონდ სააკოვის ქება დაემსახურებინათ.ეს ავადმყოფობაა. ჯერ კიდევ აგონიაში ვარ", - განაცხადა ბედუკაძემ.
ამასთან, ბედუკაძის თქმით, მისი ოჯახის წევრები ამჟამად სტამბოლში იმყოფებიან და როდესაც ისინი უკვე ბრიუსელში იქნებიან, საზოგადოება სიმართლეს მაშინ გაიგებს.
ამასთან, ბედუკაძე პრემიერ-მინისტრობის კანდიდატთან ბიძინა ივანიშვილთან შეხვედრას ითხოვს და აცხადებს, რომ "ხმამაღალი განცხადებების დრო ჯერ არაა. ქვეყანაში ყველაფერი უნდა დალაგდეს".
"არ მინდა, კიდევ რაიმე ვნებათაღელვა გამოიწვიოს. ისიც ვიცი, რატომ გაურბიან ჩემთან შეხვედრას", - განაცხადა ბედუკაძემ "რეზონანსთან" საუბრისას.