"დემოკრატიული მოძრაობა-ერთიანი საქართველო" მოუწოდებს ცენტრალურ საარჩევნო კომისიას და მის ხელმძღვანელს, არ მიიღოს მონაწილეობა გაყალბებაში.
"გუშინ, ცენტრალური საარჩევნო კომისიის მიერ უპრეცედენტოდ გაჭიანურებულმა წინასწარი მონაცემების გამოცხადებამ საზოგადოებაში გააჩინა საფუძვლიანი ეჭვი, რომ მიმდინარეობს მონაცემთა ფალსიფიცირების მცდელობა.
"დემოკრატიული მოძრაობა" დარწმუნებულია, რომ სააკაშვილის ბოლო განცხადების პარალელურად, ხელისუფლება კვლავ ყველა ხერხს მიმართავს "ქართულ ოცნებასა" და "ნაციონალურ მოძრაობას" შორის პროცენტული სხვაობის შესამცირებლად, რაც გამარჯვებულ პოლიტიკურ კოალიციას ხელს შეუშლის ქვეყნისათვის აუცილებელი ცვლილებების გატარებაში.
ყველასათვის ცხადია, რომ "ქართულმა ოცნებამ" 2012 წლის 1-ელი ოქტომბრის საპარლამენტო არჩევნებში მოიპოვა დამაჯერებელი გამარჯვება. საქართველოს მოსახლეობა დარწმუნებულია, რომ გამარჯვებულმა პოლიტიკურმა ძალამ რეალურად გაცილებით მეტი მხარდაჭერა მოიპოვა ვიდრე ცესკოს წინასწარი მონაცემები აჩვენებს.
"დემოკრატიული მოძრაობა" მოუწოდებს ცენტრალურ საარჩევნო კომისიას და მის ხელმძღვანელს, არ შეასრულოს ხელისუფლების პოლიტიკური დაკვეთა და უმოკლეს ვადაში გამოაქვეყნოს არჩევნების რეალური შედეგები", - აღნიშნულია "დემოკრატიული მოძრაობის" განცხადებაში.
მასალის გამოყენების პირობები