სასჯელაღსრულების, პრობაციისა და იურიდიულ დახმარების საკითხთა სამინისტროს ინფორმაციით, საპარლამენტო არჩევნები სასჯელაღსრულების დაწესებულებებში მშვიდ გარემოში მიმდინარეობს. ხმის მიცემის უფლების მქონე პატიმრების იმ ნაწილის უმრავლესობამ, რომელთაც ჰქონდათ სათანადო პირადობის დამადასტურებელი დოკუმენტი, უკვე გააკეთა საკუთარი არჩევანი.
"აღსანიშნავია, რომ სამინისტროს მიერ წინასაარჩევნო პერიოდში გავრცელდა განცხადება და სპეციალურად მომზადებული ვიდეორგოლი, რომელიც გადაიცემოდა სხვადასხვა სამაუწყებლო კომპანიის მიერ, რისი მიზანიც ამომრჩეველი პატიმრებისათვის ოჯახის წევრების მიერ პირადობის დამადასტურებელი დოკუმენტაციის მიწოდება გახლდათ. სწორედ აღნიშნული ღონისძიების შემდეგ პატიმართა ნაწილმა შეძლო საკუთარი აქტიური საარჩევნო უფლების რეალიზება. ამავდროულად ზოგიერთი მედიასაშუალების მიერ გავრცელებული ინფორმაცია, სასჯელაღსრულების სხვადასხვა დაწესებულებაში არეულობის, პატიმართა მიმართ არასათანადო მოპყრობისა და გლდანის #8 დაწესებულებაში სპეციალური დანიშნულების რაზმის შესვლის შესახებ არ შეესაბამება სინამდვილეს. სასჯელაღსრულების ყველა დაწესებულებაში სრული სიმშვიდეა და დაწესებულებები საქმიანობენ ჩვეულებრივი სამუშაო რეჟიმით", - ნათქვამია სამინისტროს მიერ გავრცელებულ გნცხადებაში.
მათი განცხადებით, მსგავსი მცდარი ინფორმაციის გავრცელება განაპირობებს სასჯელაღსრულების დაწესებულებებთან სხვადასხვა დაინტერესებული ჯგუფის მობილიზებას და ზოგიერთი დაინტერესებული პირის მხრიდან შესაძლოა გამოყენებული იქნას დაძაბულობის შესაქმნელად, რაც, ბუნებრივია, არც პატიმართა და მათ ახლობელთა და არც სამინისტროს ინტერესში არ შედის.
"სასჯელაღსრულების, პრობაციისა და იურიდიული დახმარების საკითხთა სამინისტრო მოგიწოდებთ, თავი შეიკავოთ გადაუმოწმებელი ინფორმაციის გავრცელებისგან, რადგან ეს, პირველ რიგში, ზიანს აყენებს პატიმრებს და იწვევს მათი ოჯახის წევრების სრულიად უსაფუძვლო მღელვარებას", - ნათქვამია განცხადებაში.
