„ჩვენ ვგმობთ ძალადობას, ადამიანის უფლებათა უხეშ დარღვევას პენიტენციალურ სისტემაში, პირველ რიგში ეს მოთხოვნა გვაქვს და მეორე შემდეგში მდგომარეობს, ჩვენ ვართ სისტემური პრობლემის წინაშე, სისტემური პრობლემა არის არამარტო პენიტენციურ სისტემაში არამედ სამშენებლო ბიზნესშიც კომპანია „დექსუსის" სახით. მათ აქვთ კორუფციული სქემა, სადაც ძირითადად ჩართულნი არიან ელიტარული კორუფციის წევრები გიგი უგულავა, სასამართლოში მოჯადოებული წრე და გამოძიება, სადაც შეტანილი გვაქვს მტკიცებულებებით აღსავსე მთელი ეს მასალები. ასევე მოვითხოვთ ბატონ ვანო მერაბიშვილთან შეხვედრას და ვიწყებთ შიმშილობას. საქართველოში სულ 6200 დაზარალებულია აქედან დაახლოებით ნახევარზე მეტი ემიგრანტები არიან", - განაცხადა „ჯი-ეიჩ-ენთან" საუბარში ერთ-ერთმა დაზარალებულმა მარინა კორძაძემ.

აქციის ერთ-ერთი მონაწილის ინფორმაციით, ერთ-ერთ დაზარალებულს, დავით ლაზარეიშვილს ნერვიულობის ნიადაგზე სისხლის გათეთრება დაემართა.

აქციის მონაწილეები პრემიერ-მინისტრს ივანე მერაბიშვილს მიმართვას უგზავნიან:

„საკმაო ხანია ვგეგმავდით დღევანდე აქციას, ამიტომ მიუხედავად ციხეებში შექმნილი ვითარებისა, გადავწყვიტეთ, ჩაგვეტარებინა ეს აქცია. შეიძლება მავანმა სთქვას, რომ პატიმრების არაადამიანური წამების ფონზე ჩვენს პრობლემებზე საუბარი საჭირო არ არის, მაგრამ დაზარალებულებიც დაახლოებით ისევე ვართ განწირულები და შეურაცხყოფილები დღევანდელი სასამართლოსა და ხელისუფლების მხრიდან, რომ ჩვენ გვაქვს მორალური უფლება ჩვენი მოთხოვნებით დღეს აქ ვიდგეთ!
სამშენებლო კომპანიის ცენტრ-პოინტის მიერ ათასობით დაზარალებულების უხეშად და მასობრივად დარღვეული უფლებების შესახებ საქვეყნოდაა ცნობილი.
ამასთან დაკავშირებით მოგმართეთ თქვენც, ჯერ როგორც შინაგან საქმეთა მინისტრს, შემდეგ კი, ამა წლის 16 ივლისს - როგორც პრემიერ-მინისტრს. თან წარმოგიდგინეთ სრულიად საკმარისი მტკიცებულებები იმისათვის, რომ აღძრულიყო სისხლის სამართლის საქმე ცენტრ-პოინტის დამფუძნებლების, როგორც თაღლითების მიმართ.
ბატონო ვანო, დღეს ისევ მოგმართავთ როგორც პრემიერ-მინისტრს, რომელსაც რეალურად ძალუძს პროცესების მართვა და ჩვენს საქმეზე გავლენის მოხდენა!
თაღლითები: დები კერვალიშვილები და ვახტანგ რჩეულიშვილი, ჰყიდიან რა თავიანთ ქონებას, მალავენ რა თავიანთ კერძო საკუთრებას თუ ფულად სახსრებს, ხელიდან გვაცლიან შანსს, კანონიერად იქნას ამოღებული მათგან ჩვენი სიმწრით ნაშოვნი ფული. სწორედ ამ ფულით უნდა დასრულდეს მშენებლობები, რათა ბოლომოეღოს ათასობით ქუჩაში დაგდებულ დაზარალებულთა წამებას და შევიდეთ ჩვენს ბინებში; ნუ გახდებით დანაშაულის თანამონაწილე!!!
დაგვეხმარეთ, უმძიმეს მდგომარეობაში ვართ დაზარალებულები. ბევრი ჩვენგანი ქირაობს ბინას, ისედაც მცირეშემოსავლიან ოჯახებს ამის საშუალება არა გვაქვს. ბევრი ჩვენგანი ნათესავებთანაა შეხიზნული, ბევრიც რაიონებში ვართ გადახვეწილნი. ძალიან ბევრი დაავადდა ბინის მოლოდინში, უფრო მეტი კი - საზღვარგარეთ განაგრძობს იძულებით შრომას, აქამდე წლების განმავლობაში სიმწრით ნაშოვნი თანხა შესტენა რა გაუმაძღარ ხახაში რჩეულიშვილ-კერვალიშვილთა უნამუსო და დამნაშავე ოჯახს!
ჩვენი დღევანდელი აქციის მოთხოვნაა:
-დაუყონებლივ აღიძრას სისხლის სამართლის საქმე თაღლითობის მუხლით და, შესაბამისად, დაუყონებლივ დაპატიმრებულ იქნან - რუსუდან კერვალიშვილი, ვახტანგ და მაია რჩეულიშვილები;
- აღიძრას სისხლის სამართლის საქმე „ცენტრ-პოინტის" ტოპ-მენეჯერების წინააღმდეგ, ყველა იმ თანამშრომლის წინააღმდეგ, რომლებმაც მონაწილეობა მიიღეს ზემოთხსენებული თაღლითური სქემის შექმნა-რეალიზაციაში, ასევე გამდიდრდნენ რა დაზარალებულთა ხარჯზე.
- დაავალეთ შესაბამის „ცენტრ-პოინტის" საქმის სასწრაფო შესწავლა;
- მოგვაშორეთ კომპანია „დექსუსი", რომელიც ისედაც გაწამებულ დაზარალებულებს ულტიმატუმის ენით გველაპარაკება, კომპანია, რომელიც არავის დაუპატიჟებია და მართავს კი ჩვენს ქონებას. მოგვაშორეთ „დექსუსი" რომელიც დამატებით თანხებს გვთხოვს, ხელშეკრულების პირობებს გვიუარესებს, ცდილობს ერთმანეთს დაგვაპირისპიროს, საზოგადოებას ატყუებს და თვალს უხვევს!!! ამასთან „დექსუსმა" დაუყონებლივ უნდა გაგვიფორმოს ბინები და კომერციული ფართები, დააბრუნოს არამიზნობრივად დახარჯული ჩვენგან ამოღებული ფული და პასუხი აგოს ზემოთაღნიშნულ თაღლითობაში თანამონაწილეობაზე!
- გთხოვთ გადახედოთ სასამართლოს გადაწყვეტილებებს ჩვენს საქმეებზე. სასამართლოები იცავენ თაღლითების ინტერესებს და ფაქტიურად გამოდიან როგორც „ცენტრ-პოინტის" მხარე. გთხოვთ გაითვალისწინოთ ეს გარემოება და შექმნათ სამთავრობო კომისია ჩვენს საქმესთან დაკავშირებით, რომელიც შეისწავლის საერთოდ „ცენტრ-პოინტის" საქმეს, სასამართლოთა მიერ გამოტანილი განაჩენების ჩათვლით. მზად ვართ დავეხმაროთ კომისიას ობიექტური სურათის შექმნაში. კომისიის დასკვნის საფუძველზე მთავრობას შესაძლებლობა მიეცემა უმოკლეს დროში შეიმუშაოს ჩვენი მდგომარეობის გამოსწორების გეგმის ჩამოყალიბება;
-შესაბამისმა სახელმწიფო ორგანოებმა დაუყონებლივ აღიარონ შიდა ვალად კომპანია „ცენტრ-პოინტისგან" დაზარალებულთა ზარალი, რადგანაც არა მხოლოდ კერვალიშვილი და რჩეულიშვილის დამნაშავე ოჯახია პასუხისმგებელი ჩვენს გაუბედურებაში, არამედ სახელმწიფოც, რომელმაც ვერ უზრუნველყო თაღლითებისაგან ათასობით თავისი მოქალაქის დაცვა და ახლაც ვერ უზრუნველყოფს მათი ინტერესების დაცვას, თუმცა უკვე ყველაფერი დღესავით ნათელია".
-