დღეს, 24 სექტემბერს, საქართველოს სახალხო დამცველის აპარატი საქართველოს მთავარ პროკურატურას შესაბამისი რეაგირებისთვის რუსთავის N6 დაწესებულებაში განთავსებული მსჯავრდებული გოდერძი კიკნაძის ახსნა-განმარტებას გადასცემს.
რუსთავის N6 დაწესებულებაში განთავსებული მსჯავრდებული გოდერძი კიკნაძე ამბობს, რომ მის მიმართ განხორციელებული მოპყრობის მიზანი იყო, 2001 წელს ყოფილ N5 სასჯელაღსრულების დაწესებულებაში მომხდარ თ.დ.-ს მკვლელობის გარემოებებზე მის ხელთ არსებული ინფორმაციის განსაჯაროებისაგან თავის შეკავება.
კიკნაძე მასზე განხორციელებულ წამების ფაქტებსა და მიზეზებზე სახალხო დამცველის წარმომადგენლისთვის თავისი ხელით დაწერილი ახსნა-განმარტებაში საუბრობს.
სახალხო დამცველის აპარატის მიერ გავრეცემულ ინფორმაციში აღნიშნულია, რომ 22 სექტემბერს სახალხო დამცველის წარმომადგენლებმა კიდევ ერთხელ მოინახულეს რუსთავის N6 დაწესებულებაში განთავსებული მსჯავრდებული გოდერძი კიკნაძე. კიკნაძემ უკვე გამოთქვა მათთან საუბრის სურვილი და გადასცა თავისი ხელით დაწერილი ახსნა-განმარტება, სადაც იგი საუბრობს ზეწოლის იმ ფაქტებზე, რომელიც მის მიმართ სასჯელაღსრულების N6 დაწესებულებაში განხორციელდა.
გოდერძი კიკნაძის განცხადებით, მან შიმშილობა მის მიმართ არასათანადო მოპყრობის შეწყვეტის მოთხოვნით 19 სექტემბერს დაიწყო. დღეისათვის მსჯავრდებული მოითხოვს მთავარი პროკურატურის წარმომადგენელთან შეხვედრას, რომელსაც ჩვენებას მისცემს ზემოაღნიშნულ საქმეზე.
მონახულების მომენტისთვის მსჯავრდებულს აღენიშნებოდა შემდეგი დაზიანებები: მოყვითალო-მოშავო ფერის სისხლნაჟღენთები და შეშუპებები ორივე თვალბუდის არეში, მარცხენა და მარჯვენა ყვრიმალის და საფეთქლის არეში, ასევე, შუბლზე - მოყვითალო ფერის სისხლნაჟღენთი. ყელის არეში, მარცხენა მხარეს, მსჯავრდებულს აღენიშნება მცირე ზომის ჰიპერემიული უბანი, ორივე ქვედა კიდურზე - რამდენიმე ნაჭდევი, დაფარული ფუფხით. 21 სექტემბერს, მსჯავრდებულ გოდერძი კიკნაძის სამედიცინო ბარათში გაკეთებული ნევროპათოლოგის კონსულტაციის ჩანაწერის მიხედვით, მას აღენიშნება მსუბუქი ხარისხის თავის ტვინის შერყევა.
მსჯავრდებულის განმარტებით, უკანასკნელი დღეების განმავლობაში იგი დღეში ორჯერ ხვდებოდა დედას. იგი ასევე მოინახულეს მისმა ადვოკატებმა და მოძღვარმა.
გოდერძი კიკნაძის ჯანმრთელობის მდგომარეობიდან გამომდინარე, სახალხო დამცველის აპარატი მოუწოდებს სასჯელაღსრულების, პრობაციის და იურიდიული დახმარების საკითხთა სამინისტროს უზრუნველყოს სათანადო ზომების მიღება.