საქართველოს პრეზიდენტმა ბათუმის მოსახლეობას "ერთიანი ნაციონალური მოძრაობის" მაჟორიტარი კანდიდატი გიორგი ბარამიძე პირადად წარუდგინა.
"ჩემი ყველაზე ახლო პოლიტიკური თანამებრძოლი, მეგობარი მინდა წარვადგინო კანდიდატად იქ, იმ ქალაქში, ბათუმში, რომელიც ჩემთვის ყველაზე ძვირფასი რამ არის ცხოვრებაში. მაჟორიტარი არსად წარმიდგენია, ეს განსაკუთრებული შემთხვევაა, ისევე, როგორც ბათუმია განსაკუთრებული", - განაცხადა სააკაშვილმა. მისი თქმით, ის პოლიტიკაში სწორედ გიორგი ბარამიძემ წაიყვანა.
"პოლიტიკაში მომიყვანა ადამიანმა, რომელსაც ჩემნაირი ინტერესები ჰქონდა, იყო ჩემი ასაკის. ის ჩემთვის პატრიოტიზმის მაგალითი იყო. აფხაზეთის ომის დროს, ერთად ვმონაწილეობდით ტყვეთა გაცვლის პროცესში და იქ დავახლოვდით. ამის შემდეგ, მისი ინიციატივით მოვედი პარლამენტში. ჩემი პირველი ნათლობა მისგან მაქვს მიღებული და ეს არასდროს დამავიწყდება", - განაცხადა სააკაშვილმა.
მისი თქმით, წლების განმავლობაში გიორგი ბარამიძეს მუხლი არ ჩაუხრია და არასდროს წასულა კომპრომისებზე უწმინდურ ძალასთან. ამასთან, პრეზიდენტის თქმით, ბარამიძემ ბევრი გააკეთა იმისთვის, რომ საქართველო უკეთესი ქვეყანა გამხდარიყო.
ამომრჩეველთან შეხვედრა ბათუმის მშენებარე საზაფხულო თეატრში გაიმართა. მიხეილ სააკაშვილმა ადგილობრივებს ქალაქში მიმდინარე მასშტაბურ პროექტებზე ესაუბრა და ხაზგასმით აღნიშნა, რომ მომდევნო ოთხ წელიწადში ბათუმის ის ნაწილიც აღორძინდება, რომელსაც აღმშენებლობა ჯერ არ შეხებია.
ქვეყნის პირველი პირის თქმით, „ბათუმი მთელის საქართველოს სავიზიტო ბარათია" და თითოეული მოქალაქის მთავარი სიამაყე.
