ლაგოდეხი და წნორი ეკონომიკური, სავაჭრო და ლოჯისტიკური ცენტრის ფუნქციას შეიძენს, - განაცხადა საქართველოს პრეზიდენტმა მიხეილ სააკაშვილმა პრეზიდენტის სასახლეში ხელისუფლების წარმომადგენლებთან გამართულ შეხვედრაზე, სადაც მან კახეთში სტიქიის შედეგების აღმოფხვრის სამუშაოებისა და რთველის სამზადისის შსახებ ინფორმაცია მოისმინა.
„პროდუქციის გასაღებისთვის ჩვენ ლაგოდეხში ვაკეთებთ ბაზას, რადგან ამ თვალსაზრისით, რეალურად, ლაგოდეხი უნდა გახდეს რეგიონალური ცენტრი, საამისოდ იქ დიდი პოტენციალია. ლაგოდეხი ადრე ყოველთვის იყო ჩიხი, მაგრამ აზერბაიჯანთან ჩვენი ურთიერთობისა გათვალისწინებით, ლაგოდეხი და წნორი უნდა გახდეს სავაჭრო ცენტრი. ჩვენ უნდა ვიმუშავოთ იმისთვის, რომ მომავალში წნორი აზერბაიჯანთან რკინიგზით დავაკავშიროთ და სავაჭრო და ლოჯისტიკური ცენტრის ფუნქცია შეიძინოს არა მხოლოდ სიღნაღისთვის, არამედ კახეთისა და მთელი საქართველოსთვის. ორივეს, ლაგოდეხსაც და წნორსაც, უახლოესი მომავალი სწორედ ეს აქვთ. იქ ამის პოტნციალიც არის და ხალხსაც შესაბამისი განწყობა აქვს. ასე რომ, ამ მიმართულებით უნდა ვიმუშაოთ", - განაცხადა საქართველოს პრეზიდენტმა.
მიხეილ სააკაშვილმა ლევან ბეჟაშვილს მადლობა გადაუხადა გაწეული საქმიანობისთვის და აღნიშნა, რომ კახეთის დასახმარებლად საკმაოდ მაღალი თანამდებობის დატოვება ძალიან დასაფასებელი და მნიშვნელობანი ნაბიჯია.
„კიდევ ერთხელ მინდა დიდი მადლობა ვუთხრა ლევანს, რადგან მან ძალიან დროული და მნიშვნელოვანი გადაწყვეტილება მიიღო კახეთის დასახმარებლად, რის გამოც საკმაოდ მაღალი თანამდებობიდან დატოვა. ჩემთვის ეს მეტად დასაფასებელი ნაბიჯია. ამას ბევრი არ გააკეთებდა, მაგრამ კახელები საქმის ხალხია და მართლა შესტკივათ გული საკუთარ მხარეზე. გიორგი ღვინიაშვილი ძალიან კარგად მუშაობდა, მაგრამ დახმარება მასაც სჭირდებოდა. ჩვენ ყველანი ერთად ვმუშაობთ იმისთვის, რომ ამ კუთხეს ეს სტრესი და გაჭირვება გადავატანინოთ და კახეთი ამ მდგომარეობიდან კიდევ უფრო გაძლიერებული გამოვიდეს", - განაცხადა ქვეყნის პირველმა პირმა.
