საარჩევნო ბლოკს "ბიძინა ივანიშვილი - ქართულ ოცნებას" საარჩევნო ნომერი 41 კანონის საფუძველზე, განკარგულებით მიენიჭა, - ამის შესახებ ცენტრალური საარჩევნო კომისიის სპიკერმა , ეკა აზარაშვილმა ჟურნალისტებს განუცხადა.
რიგითი ნომრების მინიჭება სცილდება როგორც ცესკო-ს, ასევე ცესკო-ს თავმჯდომარის უფლებამოსილებას და მას არეგულირებს საარჩევნო კოდექსი. ცენტრალურმა საარჩევნო კომისიამ კი არ მიიღო გადაწყვეტილება ნომრის მინიჭების შესახებ, არამედ 41 ნომერი მათ განკარგულებით, კანონის საფუძველზე მიენიჭათ", - აღნიშნა აზარაშვილმა.
მისივე განმარტებით, 2010 წელს, როდესაც ბლოკებმა მოახერხეს ნომრების არჩევა, ცესკომ დადგენილება მიიღო, რის საფუძველზეც ბლოკებს ნომრის არჩევის საშუალება მიეცათ. ასეთი დადგენილება კი ამ არჩევნებისთვის არ მიუღიათ.
აზარაშვილმა აღნიშნა, რომ საარჩევნო ბლოკებისთვის ნომრების მინიჭების ბოლო ვადად 25 აგვისტო იყო გამოცხადებული, თუმცა, აზარაშვილის განცხადებით, რადგან ერთი ბლოკი იყო ნომრის გარეშე დარჩენილი, ნომრის მინიჭების საკითხი ცესკო-ს დღევანდელ სხდომაზე გადაწყდა.
"ქართულ ოცნებას" ცესკოს ამ განკარგულების გასაჩივრება სასამართლოს გზით შეუძლია.