ბიძინა ივანიშვილმა მსოფლიო ბანკთან არსებულ საინვესტიციო დავათა განხილვის საერთაშორისო ცენტრში საქართველოს მთავრობის წინააღმდეგ საარბიტრაჟო განაცხადი შეიტანა. როგორც "ქართულ ოცნებაში" აცხადებენ, საარბიტრაჟო განაცხადის შეტანას წინ უსწრებდა 2012 წლის 31 ივლისს საქართველოს პრეზიდენტისთვის და იუსტიციის მინისტრისთვის უკანასკნელი შეტყობინების ჩაბარება, რომლითაც ბიძინა ივანიშვილმა საქართველოს მთავრობას მისცა 14 დღის ვადა, რათა სახელმწიფოს ეღიარებინა ბიძინა ივანიშვილის წინააღმდეგ განხორციელებული პოლიტიკურად მოტივირებული უკანონო ქმედებანი და შესდგომოდა მოლაპარაკებას მიყენებული ზიანის ანაზღაურების თაობაზე. შეტყობინებით განსაზღვრული ვადა ამოიწურა 2012 წლის 14 აგვისტოს. "აღნიშნულ შეტყობინებას სახელმწიფოს მხრიდან პასუხად მოჰყვა ის, რომ სახელმწიფომ დაიქირავა იურიდიული ფირმა "Dechert LLP“, რომლის მეშვეობითაც 2012 წლის 13 აგვისტოს ბიძინა ივანიშვილის სამართლებრივ მრჩევლებს ეცნობა ის, რომ სახელმწიფოსათვის მიცემული 14 დღის ვადა არ იყო გონივრული და რომ ისინი შეტყობინებაზე პასუხს გასცემენ მას შემდეგ, როდესაც შეტყობინებაში დასმულ საკითხებს თავის კლიენტთან (საქართველოს მთავრობასთან) განიხილავენ. თავიანთ წერილში სახელმწიფოს სამართლებრივი მრჩევლები იტოვებენ უფლებას სადაო გახადონ საარბიტრაჟო ტრიბუნალის იურისდიქცია", - აცხადებენ კოალიციაში. მათი განცხადებით, ვინაიდან 14-დღიანი ვადა უშედეგოდ იქნა ამოწურული, ივანიშვილის სამართლებრივმა მრჩევლებმა - Skadden, Arps, Slate, Meagher & Flom (UK) LLP - 2012 წლის 15 აგვისტოს ოფიციალური საარბიტრაჟო განაცხადით მიმართეს მსოფლიო ბანკთან არსებულ საინვესტიციო დავათა განხილვის საერთაშორისო ცენტრის (ICSID) სამდივნოს და მოითხოვეს განაცხადის რეგისტრაცია. განაცხადის რეგისტრაციას შემდეგ მოხდება საარბიტრაჟო ტრიბუნალის ჩამოყალიბება, რომელიც განიხილავს დავას ბიძინა ივანიშვილსა და საქართველოს მთავრობას შორის.