„ქართული ოცნების" მაჟორიტარი დეპუტატობის კანდიდატი თეა წულუკიანი დღეს ლოტკინზე მდებარე ბოშათა დასახლებას ეწვია.
მოსახელობასთან შეხვედრამდე, წულუკიანმა ნადეჟდა მარტინოვას ოჯახი მოინახულა, რომელიც უკიდურეს გაჭირვებაში ცხოვრობს.
„ამ ადამიანს ყავს რვა შვილი, მათ შორის ერთ-ერთი ინვალიდობის მქონეა. თავად ნადეჟდა მარტინოვა მძიმედ არის ავად, ჭირდება ძვირადღირებული სამედიცინო დახმარება, თუმცა ის მათხოვრობით ირჩენს თავს და შესაბამისად ვერც მკურნალობას იტარებს. ამ ოჯახმა თბილისის მერიას არაერთხელ მიმართა დახმარების თხოვნით, თუმცა ამაოდ. თბილისში სულ 800 ბოშა ცხოვრობს. ამ ადამიანთა უმრავლესობა ამ უბანშია დასახლებული. ჩვენი ვალდებულებაა ამ ხალხს ადამიანურად ცხოვრების პირობები შევუქმნათ და მე მათ ამის პირობას ვაძლევ" - განაცხადა წულუკიანმა
მისივე თქმით, ბოშებს უნდა მიეცეთ მცირე ბიზნესის წარმოების შესაძლებლობა, რაც მათი შემოსავლის ძირითადი წყაროა. დღესვე მაჟორიტარი დეპუტატობის კანდიდატი ხერთვისის 22 ნომერში, აფხაზეთის ომში დაღუპული თომა ბარნაბიშვილის ოჯახს ეწვია. დაღუპული მეომრის 79 წლის დედა უკიდურეს გაჭირვებაში ცხოვრობს.
„ამ ქალბატონს მისი შვილის გმირობისთვის დანიშნული 20 ლარიანი შემწეობაც მოუხსნეს. ჯერ ის რამხელა ცინიზმია, როცა ქვეყნის ერთიანობისთვის დაღუპული მეომრის დედას, რომელსაც გმირობისთვის ვახტანგ გორგასლის მე-3 ხარისხის ორდენი აქვს მიღებული, 20 ლარიან შემწეობას უნიშნავ და მერე იმასაც მოუხსნი" , - აღნიშნა წულუკიანმა.
მისვე თქმით, მსგავსი მაგალითები არც ნაძალადევში და საქართველოში არ უნდა არსებობდეს.
დღესვე თეა წულუკიანმა მოსახელობას „ქართული ოცნების" ჯანდაცვის, დასაქმების, განათლების პროგრამები გააცნო და არსებული პრობლემების მოგვარების მისეული გეგმის შესახებ ესაუბრა.
