მტერმა ჩვენზე უკეთესად იცის, რომ ჩვენი მიწის არც ერთი გოჯი არ შერჩება, - ამის შესახებ საქართველოს პრეზიდენტმა მიხეილ სააკაშვილმა ფოთის ნავსადგურში შეკრებილებს სიტყვით მიმართა. პრეზიდენტი ფოთის ნავსადგურში აგვისტოს ომის დროს დაბომბვის შედეგად დაღუპულთა ხსოვნისადმი მიძღვნილ პანაშვიდს დაესწრო შემდეგ კი შეკრებილებს სიტყვით მიმართა.
პრეზიდენტმა 4 წლის წინანდელი ღამე გაიხსენა, როდესაც რუსეთის საოკუპაციო ნაწილების სტრატეგიულმა ბომბდამშენმა ფოთის ნავსადგური დაბომბა.
მისი თქმით, ფოთის პორტში იყვნენ გმირი თანამშრომლები, რომლებიც საქართველოსთვის ყველაზე გადამწყვეტ მომენტში გამოვიდნენ ღამის სმენაში და სიცოცხლის რისკის ფასად უზრუნველყოფდნენ, რომ საქართველოს მეურნეობას ფუნქციონირება არ შეეწყვიტა.
"ფოთის დაბომბვის შემდეგ, ბათუმის პორტში დენის გათიშვა მოვასწარით და მას ტრასა, რომელიც განათებული იყო, პორტის და აეროპორტის ტერიტორია ეგონა და ჩამოაგდო ამ ტრასაზე ბომბი, სადაც ჩვენ 10 ადამიანი დაგვეღუპა და 80-მდე დაშავდა", - განაცხადა სააკაშვილმა.
მისვე თქმით, მტერმა მიზანს ვერ მიაღწია - მისი მიზანი ძალიან კონკრეტული იყო, დაეკნინებინა საქართველოს პოლიტიკური მნიშვნელობა, ჩაეკეტა საქართველოს სატრანსპორტო და სატრანზიტო გზები, მათ შორის ფოთი, დაემხო საქართველოს მთავრობა და ფიზიკურად გაენადგურებინა საქართველოს ლიდერები.
"შეეცვალა საქართველოს დემოკრატიული წყობილება და მისი სვლა ნატოსკენ. არც ერთი ეს მიზანი არ არის მიღწეული. მტერმა ჩვენზე უკეთესად იცის, რომ ჩვენი მიწის არც ერთი გოჯი არ შერჩება და იცის ისიც, რომ თუ საქართველო ბოლოდე გაიმართა წელში, როგორც ჩვენ ვგეგმავთ, მას მოუხდება ჩვენი ქვეყნის დეოკუპაცია და აქედან თავის ჯარების გაყვანა", - განაცხადა სააკაშვილმა და აღნიშნა, რომ საქართველოს მთელი პროგრესული დემოკრატიული სამყარო უდგას გვერდით.
